Tura, Jylliew 16
Ka kynhun A’chik Conscious Holistic Integrated Krima (ACHIK) ha ka Sngi Thohdieng ka la sdang ban pynjur ïa ka jingdawa ban pynlong ïa ka Tura kum ka nongbah ka Meghalaya ha ka por tlang da kaba shong kyllaiñ mungor hakhmat ka Mini Secretariat kaba don ha Dakopgre ha Tura.
Ki ’riew paidbah bad kumjuh ruh ki nongïalam na ki seng bapher bapher ki la wan ban ïashim bynta ha katei ka jingïalang kaba long ka sien banyngkong ha kaba ïadei bad ka jingdawa ban pynlong ïa ka Tura kum ka nongbah ha ka por tlang.
Haba kren ha ka jingïalang, u President ka ACHIK Krima Council, u Thomas M Marak, u la pyntip ba wat la ka dei ka mat kaba la ïamynjur da ki nongseng ïa ka jylla ban pynlong ïa ka Tura kum ka nongbah kaba ar lane ka nongbah ha ka por tlang, hynrei ym shym la pyntreikam pat ïa kane wat hadien ba ka Meghalaya ka la dap 51 snem.
U Macklawrence M Sangma, Working President ka ACHIK Krima Council, u la ong ba ha ki 51 snem ba la leit, kiba bun ki seng na Rilum Garo ki la ai da ka jingthoh ban dawa halor katei. Hynrei u la ong pat ba ka dei ka sien banyngkong ba ïa katei ka jingdawa la pynsngew ha kane ka rukom.
U nongïalam barim ka GSU uba long ruh u CEM barim ka GHADC, u PK Sangma, u la ïashim bynta lang bad u la kdew ba ka jingpynlong ïa ka Tura kum ka nongbah ha ka por tlang ka dei ka hok jong ki paid nongshong shnong ka Rilum Garo namar ka dei kaba la ïamynjur da ki nongïalam kiba la ïashim bynta ha ka jingïakhih ban ïoh jylla lajong. U la ong ba ka jingïoh ïa ka jylla Meghalaya kaba pura kam pat biang khlem da pynlong ïa ka Tura kum ka nongbah ha ka por tlang.
Ka Bernita R. Marak, General Secretary, ACHIK Krima Council, ka la kdew ba lada buh ïa ka nongbah ha ka por tlang ha Tura, kan don ka ïingdorbar thawaiñ, sorkar jylla bad ka ïingbishar ka ban treikam na ka bynta hynriew bnai.
U Laben Ch. Marak, uba dei u MCS bad MPS barim, u la ong ba ka Reservation Roster bad ka jingpynlong ïa ka Tura kum ka nongbah ha ka por tlang ka dei ka hok jong ki paid nongshong shnong ka Rilum Garo.
Ki nongïalam jong kiwei pat ki kynhun kum ka GSU (Interim), GSMC, FKJGP, TGCSU, Mahindra Pick Up Union bad kiwei ki la ïashim bynta ha katei ka jingïalang. La shim ruh ïa ka rai ban pynlong ïa ki jingïalang pynsngewthuh bad pynshai halor katei ka mat jingdawa ha ki sngi ban wan sha baroh ki distrik bad ki block ha Rilum Garo.
