Shillong, Jylliew 16:
Ka ‘Voice of the People Party’ (VPP) ka la phah shithi sha u Symbud Myntri Rangbah ka Jylla uba peit ruh ïa ka tnad kam pohïing, Bah Prestone Tynsong ban pan jingshai halor ka jingthung kam pulit ba la pynlong da ka Central Recruitment Board, Meghalaya.
Ka seng lyngba ka shithi na u General Secretary ka VPP, Dr. Ricky A.J. Syngkon ka kwah ban pan jingshai halor ka jingthung kam pulit ba la pynlong da ka Central Recruitment Board, Meghalaya, Shillong, ha ka 6 tarik u Lber, 2022 na bynta ka kam ‘Driver Constable’ hapoh ka thup kyrdan Khasi/Jaiñtia.
“Ngi la ïoh jingtip ba uwei u kyrtong ïa uba la tip kyrteng kum u Alwist Maring uba don ïa u Roll No. – 27002167 bad uba dei na 16 – Ri-Bhoi District u la ïoh ïa ki ‘mark’ kiba heh, hynrei ha ka jingkyndit jong u, ym shym la khot ïa u na bynta ka ‘Interview’ katba ïa katto-katne kiwei pat ki kyrtong kiba la ïoh pdiang ïa ki ‘mark’ kiba kham duna ki la shah khot na bynta ka ‘Interview’,” la ong utei u nongïalam.
Haba ïadei bad katei ka jingjia, u Dr. Syngkon u la ong ba ka seng ka kyrpad ïa u Symbud Myntri ban khmih lem ïa katei ka kam kumjuh ïa kiwei-kiwei kiba ïasyriem ha katei ka liang.
“Ka jingshimkhia na ka liang jong phi ban pyntikna ba baroh ki jingthung kam ha kane ka tnad treikam ka long kaba khuid bad ka bym noh shiliang khlem da ïapeiñ halor kiba dei hok ban ïoh,” pynkut ka shithi na ka seng.
