Shillong, Jylliew 16:
Ïa ka met jong ka longkmie-armet ba suba shah pynïap ha ka miet 14 tarik mynta u bnai, ïa kaba la tip kyrteng kum ka Kong Steffanie Lyngdoh Nonglait la tep donburom noh ha ka Sngi Thohdieng ha u Lum jingtep ka Balang Presbyterian ha Lawmali.
Kum ban shu kdew hangne, la lap ïa katei ka longkmie ba ka la khlad noh ha ïingsah jong ka, ha kaba u kurim jong ka, Bah Trophius Nongbri u la kam ba ka kurim jong u ka la shim ïa la ka jingim da kaba shu phasi.
Katei ka jingjia ka la jia ha ka miet 14 tarik Jylliew ha Mawlai Mawdatbaki Mali-I.
Ki bahaïing ha sem jong katei ka longkmie haduh mynta ki dang sah ha ka jinglyngngoh bad kim lah pdiang ïa kaei kaba la jia namar haduh mynta kim pat tip ïa ka daw jong ka jingkhlad noh jong ka.
Hashuwa ban leit ontep, ka Balang ka la pynlong ïa ka duwai ka phirat ha phyllaw ïing ha Mawlai Nongpdeng bad la ïoh ruh ïa ka jingkren na ki bahaïing ha sem bad kumjuh na ka Balang.
U Kñi jong katei ka longkmie haba ai jingkren ha kane ka sngi u la ong ba ka jingpynsngew na u kurim jong ka ha u (Kñi) halor kaei kaba la jia ka ïapher bak-ly-bak na kaei kaba u la pynsngew ha ki pulit.
“Ngim tip kaei kaba jia, ngi sah ka jingdum-jinglyngngoh ba kumno ka jia, hynrei ngi shu lap, ngi shu tip ba i la khlad…ym na ka jingkhlad na ka jingpang-jingshitom, hynrei ka jingkhlad na ki daw kiba ngim lah ban tip,” la ong u Kñi haba kren shuwa ban rah ïa ka met jong katei ka longkmie sha Lum jingtep.
“Ka long kaba pynsah lyngngoh ïa ka ïing bad ki bahaïing hasem baroh,” u la ong.
Haba ïathuh ba ka pyrsa jong u ka long kaba koit ba khiah ha ka liang ka met ka phad bad ka jingmut-jingpyrkhat, u la ong ba um sngew dei bad um lah ngeit satia ba ka pyrsa jong u kan shim noh la ka jingim namarba ka don la ki khun ki kti ar ngut bad iwei iba dang pun.
“Kumba ki dak ki shin ki paw, nga ïathuh ïa ka jingshisha…ha ka miet 14 tarik ynda nga la ïoh ïa ka ‘phone’, nga la wan mareh bad ynda nga la poi ha ïing kaba ki sah, ki briew, ki bahaïing ki la ïa bun bad nga la rung hapoh bad ïohi ba la pynthiah ïa ka met ha ka kamra kaba rit,” u la ong.
U la ong ruh ba u kurim jong ka uba don ryngkat ha katei ka por, u ïam bad lynñiar bad kumta u la khot ïa u ban kylli jingkylli halor kaei kaba la jia.
“Ha kato ka miet u (kurim) ïathuh ïa nga, u ong ba u ruh um tip, ynda u wan na jingtrei, ka phalor kaba nakhmat ka plie bad sa kawei ka phalor ka ban rung sha lum jingtep ruh ka plie. Ka bording kaba ha baranda kaba ju meh, ka dum bad ynda u la rung ha ïing, u ong ba ka meh lait tang ha ita i kamra rit bad u la ïohi ïa ine i pyrsa jong nga ba i thiah bad tap-op da ka nep,” la ong u Kñi.
U la ïathuh ruh ba ynda u kurim u la plied ïa ka nep, u la ong ba u ïohi ïa ka dak saw ha ryndang bad ong ruh ba ki khmat ki peit.
“Nalor kata, u la ong ba u la pyntap ïa ki khmat bad u la pynkup biang ïa ka nep bad mar kumta u la ong ba u la ‘phone’ sha ki bahaïing ha sem hynrei um shym la ïoh, kumta u la khang noh da ka tala bad mareh ban wan ïathuh sha ïing jong ka kmie,” u la ong.
U Kñi u la ïathuh ruh ba u kurim u la ïam la lynñiar bad ong ba balei ki briew ki leh than haduh katne, bad haba ki don jingïashun bad u, balei kim leh ïa u bad balei ki leh pynban ïa ka lok jong u.
Haba ïadei bad ka 15 tarik mynta u bnai pat, u Kñi u la ong ba la phah khot biang ïa ki bahaïing sha ka jaka ba jia ka jingjia bad ynda ki pulit ki la wan, la wan ïalam biang ïa u (kurim) ha kata ka jaka.
“Ki pulit ki la kylli tohkit ïa u…ha ka jingbatai jong u ha nga ha ka 14 tarik ka long da kumwei…nga ïohsngew da la ki jong ki shkor namar nga don lang hangto ba ka jingbatai kaba u ai sha ki pulit ha ka 15 tarik u ong ba u la lap bad u la wan lang bad u paralok jong u bad uta u paralok u wan buh ïa u ha ïing da ka ‘scooty’,” u la ong.
U Kñi u la ïathuh ruh ba u kurim ka pyrsa jong u, u la ong ha ki pulit ba “Mar syn rung ha ïing, u ong ba ki lap ïa ine i pyrsa jong nga ba i la sdien ha kamra thiah bad haba ki pulit ki ong sdien da-ei…u pyni ïa uwei u nar bad u ong ruh ba sdien da kawei ka jaiñ. Ki pulit ynda ki la kylli shano kata ka jaiñ…u ong um tip shano ka jaiñ ka la poi, mano ba la shim bad shano ka don…um tip.”
U la ong ba ynda ki pulit ki la tohkit bha ïa u kurim, u (kurim) la leit shim ïa kawei ka jaiñ saw kaba teh pandal na kawei ka borni bad u ai ha ki pulit ïa kata ka jaiñ.
“U la ong ba mar ïa ïohi kumta, u la pynhap noh shapoh ïa ka met bad uta u paralok u la phah phet noh ïa u namar u ong ba kan jynjar lada wan sa ki pulit…hynrei ma u, u ong kumno un ieh ïa ka lok bad u rah na kata ka kamra ha kata ka jingthiah kaba la lap ba ka pyrsa jong nga ka thiah,” la ong u Kñi katei ka longkmie.
Shuh shuh haba kdew ïa ki jingthoh ha ka kynroh u la bynrap ba ki bahaïing kim don jingtip eiei mano ba thoh hynrei dei tad ynda u la kylli na ka para jong katei ka longkmie, ka la ïathuh ba katei ka dei ka jingthoh bad ka jingsoi jong ka.
“Ngi sah ha ka umdum namarba ngim sngewthuh…ha kato ka miet, haba nga kylli, u khlem ïathuh ïa ka jingshisha ba ka jia kumta…hynrei u ïathuh da kumwei katba mynnin ha ki pulit kaba nga-nga ïohsngew ka long da kumwei,” la ong u Kñi.
Na ka liang ka Kur haba pynpaw ka jingsngewkhia halor katei ka jingjia, ka la ong ba ka kwah ïa ka jingbishar hok na bynta katei ka longkmie.
