Jowai, Jylliew 16:
Ha ka sien kaba nyngkong, u Symbud Myntri Rangbah ka Jylla, u Bah Sniawbhalang Dhar u la wan ïuh kjat ha Jaiñtia Hills Autonomous District Council (JHADC) ban ïathir halor ki jingeh jong ka Council.
Ïa ka jingïalang la pynlong ha Conference Hall jong ka JHADC ha ka jingdonlang u Secretary ka tnad Urban Affairs ka Sorkar Jylla, u Bah Ethelbert Kharmalki, u Chief Executive Member (CEM) ka JHADC, Bah Thombor Shiwat, Deputy CEM, Bah Lasky Rymbai, Chairman ka JHADC, Dr. Sankey Shangpung, ki MDC, ki ophisar bad ki nongtrei ka Council.
U Symbud Myntri Rangbah hadien ka jingïalang haba ïakren bad ki lad pathai khubor u la ong, ka jingwan jong u ka long ban ïakynduh ïa ki dkhot ka Executive Committee (EC) bad ki ophisar jong ka Council ban ïathir halor kiba bun ki jingeh jong ka Council.
Ha kaba ïadei bad ka bhah jong ka Council ba dei ban ïoh na ka Sorkar Jylla, u Bah Dhar u la ong ba na ka liang ka Sorkar kan pyrshang ban pyllait noh ïa ka bhah jong ka Council ha kano-kano ka por.
“Ngi la ïohi ba kat nang ïaid ki sngi ki ïa, ki jingeh ha ka Council ki la nang bun bad ka jinglut ruh ka la nang bun,” la ong u Bah Dhar da kaba bynrap ba kawei ka mat kaba kham kongsan ba ki la ïakren ka long kumno ban kyntiew ïa ka ïoh ka kot jong ka Council na ki katto-katne ki tnad ki bym ktah ïa u paidbah.
Ha kaba ïadei bad ka tulop jong ki nongtrei, u la ong ba na ka liang ka Sorkar kan pyrshang katba lah ban pynkloi khnang ban suk ïa ki nongtrei.
Ha kaba ïadei bad ka Ïawmusiang Market Complex, u la ong ba la pynkhreh ïa ka ‘Balance Estimate’ bad DPR bad mynta ka kam ka la ïaid shakhmat.
U la ïathuh ba ha ki khyndiat bnai u la shong jingïalang bad ki ophisar ka tnad PWD (Building) bad namar ka ïing mala ka dei kaba la sah slem, kumta donkam ban pit bniah ïa ki nar rod bad hadien ba la dep ïa kane, yn khot ‘tender’ da kawei khnang ban pyndep noh ïa ka.
Hadien ka jingïalang, u CEM u la aiti ïa ka dorkhas ha u Symbud Myntri Rangbah ha kaba ïadei bad ki jingdonkam jong ka Council.
