Shillong: Jylliew 16:
Ki pulit ka Search and Rescue Team (SRT) jong ka jylla ryngkat ki nongshong shnong ka Thieddieng ki la ïoh ban sei ïa saw tylli ki metïap mynta ka sngi thohdieng na ka riat kaba hap ka kali pick-up, katba kawei ka longkmie la suba ba ka la shah rong noh ha ka um bad iwei i khyllung i dang jah rngai.
Haba u nonglum khubor na Shillong u la mih dangstep ban leit wad jingtip halor kane ka jingjia u la hap ban ïaid da ka kjat kumba shi kynta shiteng na Mawsynram, East Khasi Hills District ban poi sha katei ka jaka ba hap katei kali namar ka jingsniew palat ka surok ryngkat ka jingdum lyoh kaba kah ïa ka surok khyndew.
Ynda u nonglum khubor u la poi mar shiteng eiei na ka jingïaid kjat ïa ka surok shwa ban poi ha ka shnong Thieddieng, u la lap ïa ki pulit SRT ryngkat ki nongshong shnong kiba dang pynlong ka jingwad ïa ki briew na kawei ka riat kaba ki la pyndonkam ïalade da u tyllai ban hiar sha ka riat kaba jrong kumba 400 meter eiei.
Kat haduh ka por 2:00 baje nohphai sngi la ïoh ban sei ïa ar tylli ki metïap jong ki rangbah, kata u nongñiah lem bad uwei uba nongshong ha katei kali. Nalor kata la ïoh ban sei sa ïa ar tylli kiwei pat ki met. Katba kawei ka longkmie kaba dang ïohi mynha ka Sngi palei mynta pat ym lap shuh, hynrei la suba jur ba ka la shah rong ha ka um.
Nalor kane, la ong ba ïa iwei i khyllung ba dang 2 snem ka rta kat haduh mynta ym pat lapdien, hynrei la suba jur ba ki dang jah ha katei ka riat.
Kum ban shu pynkynmaw, katei ka kali (pick-up) kaba kit ïa hynriew ngut ki briew na Mawsynram ban leit sha Thieddieng, East Khasi Hills District ka la hap sha riat kaba kynjang naduh ka 13 tarik mynta u bnai ha ka por 9 baje janmiet kaba shu antad. Hadien ar sngi jong katei ka jingjia, kata ha ka 15 tarik la lap ïa ka kali hadien ba pynlong ka jingwad shnong naduh ba ki khlem poi sha shnong.
Ka jingsdang ban wad ïa katei ka kali lem bad ki briew ka long hadien ba ka khun jong ar ngut ki briew na kitei hynriew ngut kiba la don lang ha katei ka kali bad kaba sah ha Thieddieng ka la khie shit ha ka miet jong ka 14 tarik mynta u bnai bad ka la wad ïa ka kmie bad u kpa.
Hynrei ki bahaïing kim shym la lap bad dei ha kum kane ka por ba ka shnong Thieddieng naduh ka miet jong ka 14 tarik bad haduh ka step jong ka 15 tarik ki la pynlong ka jingwad shnong ïa u nongñiah ka kali lem bad ïa ki briew kiba khlem poi ïing shuh.
Haba la wad shnong ki la phah peit ha lynti-lynti ïa ki nongñiah kali kiba leit sha Mawsynram bad ki para nongñiah kali ki la lap ba don ki ïit kiba la pait. Kumta ki nongshong shnong ha ka 15 tarik ki la leit wad sha riat bad la lap ïa kali kaba la noh sha riat.
