Tura, Jylliew 18:
Ki ïingmane bapher-bapher ka Balang Katholik na Tura ki la shim ïa ka rai ban tyrwa ïa ki jingduwai na bynta ki lanot jong ka jingïakynad ha Manipur bad kyrpad ïa u nongbuh nongthaw ba un don ryngkat bad kito kiba shah ktah ha kum kine ki por kiba ki mad jingeh.
Katei ka rai ka la wan hadien ba ki nongïalam ka Balang Katholik na ki Parish bapher-bapher ka Tura ba kynthup ïa ka Cathedral, Sacred Heart Tura, Araimile, Danakgre, bad Walbakgre, ha ryngkat bad u Bishop ka Tura, Rev. Andrew R. Marak bad Rev. Jose Chirackal, ki la lum ïa ka jingïalang ha Bishop House, Tura ha ka 17 tarik mynta u bnai.
Ka jingthmu jong ka jingïalang ka long ban ïakren halor ki mat kiba ktah ïa ki nongshong shnong ka Manipur, khamtam ka jingkulmar kaba la mih ha katei ka Jylla. Ki nongïalam ki la rai ruh ban leh eiei ha kaba ïadei bad kine ki jingeh ba ki paidbah ki ïakynduh.
Na ka liang ka Balang kan pynlong ruh ïa ki jingïaid paidbah ban pyni ïa ka jingïatylli bad kito kiba la shah ktah na katei ka jingjia.
