Dang jah rngai ka kmie hadien san sngi ba hap ka kali sha riat Thieddieng

Shillong, Jylliew 18:

Ka kmie jong iwei i khyllung ba hap lang sha riat hadien ba wanphai da ka kali pick-up na Mawsynram sha shnong Thieddieng ka dang jah rngai haduh mynta ka Sngi U Blei ka 18 tarik Jylliew, 2023 wat la ki nongshong shnong bad ki pulit Search Rescue Team ki dang pynlong ka jingwad.

Naduh ba jia katei ka jingjia ha ka 13 tarik mynta u bnai ha ka por 9 baje janmiet kumba shu antad, haba pynlong ka jingwad la shem lut lait noh sa tang kawei ka longkmie.

Ïa ka metïap jong itei khyllung ba dang 2 snem ka rta la lap ha shiteng riat ha ka 17 tarik mynta u bnai. Hynrei kaba dang sah mynta ka long ba ki pulit SRT bad ki nongshong shnong ka Thieddieng kin hap ban wad biang sa lashai ka sngi (Sngi Nyngkong) ïa kane ka longkmie.

Ka jinghap jong katei ka kali (pick-up) ka lah ban dei namar ka jingsniew ka surok bad ka jingdum u lyoh ha ka por mynmiet ha ka 13 tarik mynta u bnai.

Kumta ka Khasi Students’ Union-South West Khasi Hills District ka la pynpaw ïa ka jingsngewsih halor kaei kaba la jia ïa ki paradoh parasnam. Ka phah ruh ïa ka kyrwoh sngewlem sha ki ïing ki sem jong u Bah Shanborlin Sohtun, Kong Edwin Sohtun, Bah Atiar Bilansel, Bah Defender Bonni, Kong Gracefully Jyrwieh bad iwei i khunlung ba dang 2 snem kiba la mad ïa katei ka apot kaba sngewsih.

               Ka seng ka phah ïa ka kyrwoh sngewlem sha ki ba haïing hasem jong kine ki 6 ngut kiba la mat ïa kane ka jingjia ba sngewsih kaba lehse ka lah ban ong ba ka la mih tang na ka daw ka jingsniew ha ka surok ryngkat bad ka jinglong jong ka mariang ha kine ki sngi.

           Namar kata, ka seng ka kyntu ïa ka Tnat PWD (Roads) bad ïa ki bor sorkar bad kumjuh ruh ïa ki bor District ba ki dei ban shimkhia halor ka shilynter jong kane ka surok khnang ban pyllait na ki jingjia ba sngew sih nangne shakhmat. Ka seng ka kyrpad ruh ïa ka sorkar ban pynbha noh mardor ïa katei ka surok ka ban long ka jingshngaiñ bad ka jingmyntoi ha ka ïaid ka ïeng ïa ki paidbah nongshong shnong jong katei ka thaiñ.

Kane ka long kat kum ka kyrwoh na u samla Macdonald Marbañiang, Publicity Secretary KSU South West Khasi Hills District.