Nongstoiñ, Jylliew 18:
Katkum ka tyllong khubor ba la ïoh lum la ong ba 3 ngut ki rangbah na ka thaiñ Maweit, West Khasi Hills kiba dei ruh ki rawon ki la shu jah rngai noh katba ki dang ïa khwai dohkha ha ka wah kaba la tip kum ka Sdad Dylla kaba don sha ka thaiñ Maweit.
U Bah N.S. Langrin, Sordar ka shnong Maweit u la ong ba ïa katei ka jingjia la ïoh jingtip ha ka step jong ka 17 tarik u Jylliew, 2023.
U la ong ruh ba kitei ki 3 ngut kiba la jah rngai na katei ka jaka ki dei kiba la tip kyrteng kum u Bah Shilingbest Langrin, Huberth Marthong bad u Bah Kmenlang Nonglang kiba na ka thaiñ Maweit.
La ong ruh ba kitei ki rawon kiba ïa khwai ha katei ka jaka ki la ïadon 5 ngut bad 2 ngut na ki, ki dei kiba la leit sah miet lypa ha ka 16 tarik u Jylliew katba ki lai ngut ki dei kiba dang shu poi ha ka step 17 tarik.
U Sordar u la ong ruh ba ka don ka jingsuba ba kitei 3 ngut kiba la jah rngai ki la shah rong ha ka umsaw jong ka Wah Blei namar ba ha ka por kumba 8 baje eiei kitei ki 3 ngut ki dang ïa ïeng khwai ha uwei u mawsiang ba heh uba don harud jong ka wah. Katba 2 ngut kiwei pat ki la leit khwai kham pajih na katei ka jaka bad ha katei ka por la wan kynsan ka umsaw.
Halor katei ka jingjia, haba pyntikna biang, u Sordar u la ïathuh ba hadien ka jingleit wad jong ka shnong ha ryngkat ki pulit, ha ka 18 tarik u bnai Jylliew la ïoh ban sei ïa ka metïap ïap jong u Bah Shilingbest Langrin na kawei na ka jaka kumba 2 kilomitar duna na katei jaka kaba ki jah bad haduh mynta ka jingbteng ban wad ïa kitei ki 2 ngut ka dang ïaid shakhmat.
