Tura, Jylliew 18:
U Chief Justice ka ïingbishar ba hakhlieh duh ka Jylla, u Sanjib Banerjee ha ka Sngi Saitjaiñ u la plie ïa ka ‘Circuit Court’ ha Phulbari, na bynta ka Dadenggre Sub-Division ha ryngkat ka jingdonlang u Myntri ka tnad bording ka Jylla, nongbishar ka ïingbishar ba ha khlieh duh ka Jylla, Justice H.S. Thangkhiew, Regis-trar General ka ïingbishar ba ha khliehduh ka Jylla, Bah E. Kharumnuid, Joint Secretary ka tnad aiñ ka Sorkar Jylla, Bah D. Lyngdoh lem bad kiwei-kiwei.
Ïa katei ka jingïalang la pynlong da ka ïngbishar ba ha khliehduh ka Jylla, ha ryngkat ka jingïasnohktilang bad ka District & Sessions Court, West Garo Hills District.
Haba ai jingkren ha ka jingïalang, u Chief Justice, u Sanjib Banerjee u la ong ba ha kaba sdang um shym la sngewthuh ïa ka jingtyrwa na bynta ban plie ïa ka ‘Circuit Court’ jong ka Sub-Division namar barabor ka don ka ‘Circuit Court’ na bynta ka ïingbishar ba ha khliehduh ka Jylla ne District Court lada jia ba ka thaiñ ka ïar, hynrei hadien ba la jngoh ïa ka jaka ha u Naitung jong u snem ba la dep, u la ong ba ka long kaba donkam ban sdang ïa ka ‘Circuit Court’ hangne namar ka leit ka wan na kane ka jaka sha Dadenggre kam long kaba suk ïa ki nongshong shnong ka thaiñ.
U la ong ba ka long ruh ka jingsarong ïa ka ïingbishar ba ha khliehduh ka Jylla namar ka long kawei napdeng kiba kloi tam ban pynkhuid ïa ki mukotduma hapoh ka ri bad bynrap ba ka jingdon jong ka Khyrnit ba 6 bad ki ïingbishar jong ki District Council hapoh ka Jylla ka la ïarap shi kat dei ban pynbeit ïa ki mukotduma shimet jong ki briew.
Haba kdew ba ka ïingbishar ka khmih ïa ki hok jong ki briew, u la ong ba ki briew kim dei ban phai khmat sha ka ïingbishar ha kaba kin shah pynshitom, ka dei ka kamram jong ka ïingbishar ban pynïoh ïa ka hok, hynrei ka kamram kaba khraw jong ka ïingbishar ka long ban ïada ïa ki hok jong ki briew, u la ong.
U la pynpaw ka jingkyrmen ba ka ‘Circuit Court’ jong ka Phulbari kan pynïoh ïa ka hok hakhmat jingkhang bad pynneh ruh ïa ki hok jong ki paidbah.
