Ka O.M. kaba thymmai halor ka Reservatïon Roster ka la mih. Kane ka O.M. No. PER(AR)25/2022/Pt/23 tarik 14.06.2023 kan pyndam noh ïa ka O.M. No. PER(AR)25/2022/Pt/3 tarik 10.05.2022. Kaei ka jingpynkylla halor ka Roster System katkum kane ka O.M. bathymmai? Ban sngewthuh ïa kane, nga kwah ba ngin ïa peit shwa ïa ka O. M. kaba rim, bad balei ka la long ka bym biang:
1. Ka O.M. barim tarik 10.05.2022 ka la plie lad ïa ka Compensatory Method. Ngan nym khot hi ruh ïa ka da ka Retrospective Method, namar ym don eiei ha ka Reservation Policy ne ha ka jingbthah jong ka Meghalaya High Court shaphang ka Retrospective Method. Ka sorkar ka la leh hi da ka jingstad lade ban pynïadep ne Compensate ïa ki post kiba rim kiba khlem lah ban pyndap da kawei ka kynhun, bad ïa kane hi, baroh-baroh ki la ïa pyrshah. Te balei lane kumno ka O.M. barim ka la ailad ban leh kumne?
Ka Reservation Policy, katkum ka Resolution tarik 12.01.1972, ha ka para 2, ka kren shai ba lada ym lah ban thep ïa ki post kiba la bhah na bynta kano kano ka kynhun, da kita kiba la bhah ïa ki, yn lah ban thep ïa kita ki post da kiwei pat, bad ïa kata ka jingduna yn rah sha ka snem thep kam kaba bud, bad lada ym lah ban thep sa ha kata Khyndiat shaphang ka O. M. tarik 14.06.2023 bad ka
ka por, yn kheiñ ïadep noh, bad ïa kata ka jingduna yn kheiñ duh noh. Hynrei kane ka O.M tarik 10.05.2022, ka la plie lad ban pynïadep naduh u snem 1972, ïa ki post ki bym lah ban thep da ki Garo, bad kane ka dei namar jong ka 100 Point Roster kaba ki la wanrah bad ruh lyngba artylli ki Clause ha kane ka O. M. tarik 10.05.2022, kata ka Clause B(6) bad ka Clause D(2), kiba ong kumne:
B(6): After every recruitment cycle, an account shall be noted in the reservation roster indicating representation of Khasi and Jaiñtia, Garo, Other STs & SCs and details of backlog reserved vacancies, which will be carried forward to the next recruitment cycle.
D(2): If an appointee belonging to a Scheduled Tribe category was appointed on his/her own merit, UR will be written in column 5. If an appointee belonging to a Scheduled Tribe category was appointed on reservation, ST will be written in column 5. If an appointee belonging to an OST/OSC category was appointed on reservation, OST/OSC will be written in column 5. After making entries as indicated above, details about the number of ST and OSTs/OSCs candidates appointed by reservation, backlog reserved vacancies, if any, may be indicated in Remarks column.
Kine kï artylli ki clause B(6) bad D(2), lem bad kane ka 100 Point Roster, kyllum lang, ki la plie lad ban wanrah ïa kata ka jingpynïadep ne Compensatory Method, kaba khlem don ha ka Reservation Policy bad kaba long pyrshah ïa ka para 2 jong ka. Ki kyntien ha ka Clause B(6) bad ka Clause D(2) kiba la ailad ban leh kumne kidei kiba kren shaphang ki “backlog reserved vacancies” bad kata ka “recruitment cycle” jong ka 100 point roster, kaba mut ka cycle lane ka jingtyllun jong kita ki 100 point. Sa shisien, ngan ban biang ba kine ki “backlog reserved vacancies” bad kane ka “recruitment cycle” kim don bynta ha ka Reservation Policy, hynrei la wanrah ïa ki lyngba kane ka O. M. tarik 10.05.2022. Hooid, ka don ka kynja backlog ha ka Reservation Policy, kaba dei ïa kaba rah ïa ka jingduna sha ka shi snem thep kam kaba bud (next recruitment year), hynrei ka kut noh hangta, lada lah ne ym lah ban pyndap ïa ka jingduna ruh. Kam rah shakhmat katkum ka cycle jong ka 100 Point Roster. Na ka bynta ka jingmut jong ka Recruitment Year, nga kyrpad ïa ki nongpule bad leit shaka “DoPT Brochure on Reservation for Scheduled Castes & Scheduled Tribes,” Chapter 11, “Carrying forward of Reservations,” para 11.1. Hangne, ka kren shai ba ka snem thep kam lane “Recruitment Year” kan dei kata ka “Calendar Year” ha kaba ka don ka jingthepkam, kaba mut ba kan dei ka por naduh u 1 tarik u Kyllalyngkot/January haduh 31 tarik u Nohprah/December, jong uno uno u snem ha kaba la don ka jingthepkam. Bad kan ym lah ban tam ïa ka shi calendar year. Kane ka jingmut jong ka shi Recruitment Year ha ka Reservation Policy ka ïapher bak-ly-bak na kata ka Recruitment Cycle jong kata ka 100 Point Roster, katkum ka O.M. tarik 10.05.2022.
2. Ka O.M. barim tarik 10.05.2022, kam shim ne buh jingkheiñ pat ïa ka bhah jong ki post kiba lah dep thep haki por ba la dep. Hangne ngin hap kren shaphang ka rai jong ka Supreme Court, ha ka case “R. K. Sabharwal vs. State of Punjab” bad ka ruh ka case “J. C. Mallick vs Ministry of Railways.” Ka Supreme Court, ha kine ki case ka la rai ba “reservation of jobs for the backward classes SC/ST/OBC should apply to posts and not to vacancies.” Kane ka mut ba ka bhah kam, kam thew tang ïa ka jinglait kam, hynrei ka thew ruh ïa ki kam ne ki post kiba la dep thep. Kaba mut ba lada la dep thep ïa ka kam da ki briew na kano kano ka kynhun, lyngba ka bhah jong kata ka kynhun, kata ka kam kan ïai long ka bhah jong kata ka kynhun, wat ynda ka lait biang hadien lyngba ka jingshongthait noh, ne jingiehnoh kam noh, ne jingkiew kyrdan noh jong kita kiba lah bat ïa kata ka kam. Ynda kata ka kam ka la lait biang, kan ïai long beit ka bhah jong kata ka kynhun, bad kumta, hap thep ïa ka ruh da ki briew na kata ka kynhun hi. Te kumne, kata ka kynhun kan ym duh noh ïa ka bhah na kino-kino ki kam ne ki post kiba la dep bhah ïa ka ha ka por ba pynrung kam nyngkong.
Hynrei kane ka O.M. tarik 10.05.2022, kam shim buh jingkheiñ ïa kata ka bhah jong ki kam ba la dep thep, ne shim jingmut na kane ka rai jong ka Supreme Court. Ka long kaba lyngngoh ba ka sorkar ka khlem shim ïa kane ka jingkheiñ, namar ka Order jong ka Meghalaya High Court, tarik 05.04.2022, kaba la bthah ban shna ïa ka Roster, ka la pashat jingmut ruh sha kane ka case ba nga la kdew haneng, “R. K. Sabharwal vs. State of Punjab,” ha kaba ka Supreme Court ka la rai ba ka bhah ka thew ruh sha ki kam ne ki post, ym tang sha ka jinglait kam.
3. Ka O.M. barim tarik 10.05.2022, kam shai halor ka jingmut jong ka kyntien “Cadre Strength.” Bad ha ka jingkhmih bniah jong une u nongthoh, kane ka dei ka tynrai jong ki jingkulmar baroh. Na kane ka daw, lada phi pule ïa kane ka O.M. bad lada pyntreikam ïa ka Reservation katkum kane ka O.M., ngin ym lah ban sngewthuh shuh ïa ka para 3 jong ka Reservation Policy. Kane ka para 3 jong ka Resolution tarik 12.01.1972 ka batai ba lada ha kawei ka Recruitment Year, ne snem thep kam, ym shym lah ban pynrung kam na kano kano ka kynhun kaba ïoh ïa ka jingbhah kam, namar ba ka bynta ba kata ka kynhun kan ïoh na ka jinglait kam jong uta u snem ka long duna ïa ka 0.5, te yn kheiñ beit noh 1 bynta, lada ka bynta ka lah kot hi 0.4. Lehse, ki nongpule hangne mynta kin sngewkulmar haba ki pule shaphang kane ka bynta/fraction 0.5 lane 0.4. Ban pynsuk, to shim ïa kane ka nuksa. Lada lait 100 tylli ki kam, bad ka jingbhah ka ïaid kumba ka long mynta, ka mut ka jingbynta kam kan long kumne – Khasi 40 tylli, Garo 40 tylli, UR 15 tylli, Others 5 tylli. Ka mut na ka 100 tylli, ka jingïoh bynta kan long 40, 40, 15 bad 5. Ka lah ban long pat ba ha uwei u snem, ka jinglait kam ka duna bha, lehse tang hapoh 8 tylli ne hapoh 10 tylli ruh, bad ka bynta jong kawei na kine ki kynhun kan ym kot tang 1 ruh, hynrei kan poi tang 0.5 ne 0.4. Ka para 3 jong ka Reservation Policy ka ong ba ha kum kata ka khep, ïa kane ka bynta 0.4, yn khein beit noh kum 1 bynta, khnang ba kata ka kynhun kan ym duna ka jingïoh bynta.
Hynrei, kane ka jingkheiñ bynta kam bad kane ka para 3 jongka Resolution kan ym ïoh jaka shuh lada ngi pyntreikam ïa ka Reservation katkum kane ka O.M. tarik 10.05.2022. Bad ka tynrai ka long ka jingkulmar halor ka jingmut jong ka kyntien cadre lane cadre strength, ha kaba ïadei bad ka Reservation. Na ka bynta ka jingmut jong ka Cadre Strength ne Cadre, ha kaba ïadei bad ka Reservation, nga kyrpad ïa ki nongpule bad leit sha ka “Brochure of Reservation” jong ka Dept. of Public Enterprise, Chapter 4, para 4.2. Hangne ka batai shai ba ka “cadre” lane “cadre strength” ha kaba ïadei bad ka Reservation, ka thew ïa ka jingdon ki post ne ki kam kiba dei ban thep ha uwei u snem, bad kam thew ïa ka jingdon ki post ne ki kam baroh, kynthup ïa kiba la dep thep ha ki por ba la dep. Te kumta, ka Cadre Strength kan ïapher na uwei u snem sha uwei pat. Bad ïa ka bhah thungkam dei ban kheiñ katkum kane ka Cadre Strength, lane katno tylli ki post ki don ban hap thep ha uwei u snem thep kam. Hynrei katkum kane ka O.M. tarik 10.05.2022, bad ka 100 Point Roster, kam shai ïa ka jingmut jong ka kyntien Cadre Strength, bad na kata ka daw, ka lah pyntreikam ïa ka bhah katkum ka jingdon ki post salonsar, naduh ki por ba la dep haduh mynta, wat naduh u snem 1972 ruh. Kumba nga la thoh haneng, kane ka dei ka tynrai jong ki jingkulmar baroh.
Lyngba kine ki 3 tylli ki mat, u nongthoh u pyrshang ban pyni ïa ki daw jong ka jingbym biang jong ka O.M. tarik 10.05.2022 bad ka Roster jong ka. Hynrei mynta ka O.M. ba thymmai ka la mih, tarik 14.06.2022. Nga ïohi ba ki don 7 tylli ki jingpynkylla ha kane ka O.M. ba thymmai. Ki artylli kiba kham kongsan ki dei ki jingpynkylla ïa kitei ki Clause ba la kdew haneng, ka Clause B(6) bad ka Clause D(2), ha kaba la weng noh ïa ka jingkren shaphang ki “backlog reserved vacancies” bad ka “recruitment cycle.” Kine ki jingpynkylla, i kumba ki la weng noh ïa ka jingpynïadep lane compensatory method. Kane kadei kaba donkam eh, ban nym don ka jingïatyngkhuh hapdeng ka O.M. ba mynta bad ka para 2 jong ka Resolution tarik 12.01.1972, kumba la kdew ha ka mat banyngkong. Hynrei, ïa ki jingduna jong ka O.M. tarik 10.05.2022, katkum ba la kdew ha ki mat 2 bad 3 haneng, kane ka O.M. tarik 14.06.2023, kam pat shym la lah ban pynbeit. Kumta ka dang duna bha. Bad ka jingbym shai halor ka jingmut jong ka Cadre Strength ka mut ba kane ka O.M. ba thymmai ruh kan dang ïaid hi katkum ka Compensatory Method. Wat lada la weng ïa ki kyntien kiba kren shaphang ki “backlog reserved vacancies” bad ka “recruitment cycle” na ka clause B(6) bad ka clause D(2), hynrei khlem ka jingsngewthuh shai ïa ka Cadre Strength, ka jingpyntreikam ïa ka bhah kan ym ïaid katkum ki post kiba lait ha uwei u snem, hynrei katkum ka jingdon ki post baroh. Bad ruh, ka jingbymlah jong ka O. M. tarik 14.06.2023 ban shim jingkheiñ katkum ka mat ba 2 ba la pyni haneng, ka lah ban wanrah ïa ka jingduh noh ïa ki post ne ki kam, jong kano-kano ka kynhun, kiba la thep ha ki por ba la dep, katkum ka bhah jong ka.
(Phi lah ban ïakren kham bniah bad ai jingmut ïa u nongthoh ha ka email [email protected]).
