Shillong, Jylliew 18:
U nongïalap ilekshon ba shyrkhei ka UDP na Sohïong, Bah Amazing Kurbah u la pynshai ba ym shym la don ba khot ïa u sha ka jingïalang jong ka Voice of the People Party (VPP) kaba la long ha Sohïong ha kine ki khyndiat sngi ba la dep.
Kane ka jingpynpaw u Bah Amazing ha u nonglum khubor U Nongsaiñ Hima ka dei hadien ba ki paidbah lyngba ki ‘comment’ ha ‘YouTube’ ki la kylli shaei jah u Bah Amazing.
U Bah Amazing u la ïathuh haba ka don ka jingïalang VPP ha Sohïong ym shym la don ba khot ne pyntip sha u.
U la ïathuh ruh ba um kwah ban tuklar than ïa ka Sohïong namar ha ka ilekshon MDC ka shnong jong u, ka thep ‘vote’ ha Mawphlang-Diengïei konstitwensi namar ki ïoh ban thep ‘vote’ tang ha ka MLA, kata hapoh Sohïong konstitwensi.
U la pynshai ruh ba haba u leit ban rah ‘placard’ ha ïingsah u MLA ka Sohïong, Bah Synshar Lyngdoh ka dei ba u leit kyrpad ïa u MLA ba un kren ïa ka bhah thung kam thung jam kaba u Bah Ardent M. Basaïawmoit, President ka VPP u ïakhih halor ka jingeh jong ka jaidbynriew.
U la ong ba haduh mynta u dang dei u nongkyrshan ka UDP naduh ba u ñion ïa ka ‘vote’ haduh ban da kut ka san snem.
Shuh shuh u la ong ba ha katei ka sngi kaba long jingïalang ka VPP kaba la wan lang u Bah Ardent, ma u ruh u don ka jingïalang bad ki ‘Engineer’ ka tnad PHE ban sam um ïa ka thaiñ Rangshken baroh kawei.
