Shillong, Jylliew 18:
Ka shnong Madanrting, kawei na ki shnong hapoh ka nongbah kaba ki briew na Manipur ki wan ban rieh tngen namar ka jingïakynad ha katei ka Jylla kaba la neh la palat shi bnai mynta, ka la shim ïa ka rai ba kan ym pdiang shuh ïa ki briew kiba wan na katei ka Jylla.
Ka jinglong-jingman ka shong suk shong shngaiñ ha Manipur namar ka jingïakynad jaidbynriew kaba jur kaba la ïalam ruh sha ka jingduh noh jong bun ngut ki mynsiem briew, ka la pynlong ïa ki jaidbynriew ’riewlum na katei ka Jylla ban wan phet rieh sha Shillong ha une u bnai ba la dep.
“Ka jingdon jong ki briew kiba wan na Manipur hapoh shnong ka la duna. Mynta ki don sa kumba 50-60 ngut kiba sah bad ki bahaïing. Kiba bun ki la mih namar ngim shah ïa ki ban shong neh hapoh shnong,” la ong u Assistant Secretary ka Madanrting, Bah Wanlambok Malngiang.
U la ïathuh ruh ba katkum ki kaiphod ba la ïoh lum, kitei kiba la mih noh na shnong ki la leit sha ka Jylla Mizoram.
Haba ïathuh ba ka shnong ka la pynlong ïa ka jingïaid ïing ban peitngor ïa ki briew kiba sah ha Madanrting, u Bah Malngiang u la ong ba ïa mynta, ka shnong ka la bthah bad phah jingthoh sha ki trai ïing ba kin ym ai wai ïing ïano-ïano khamtam ïa kito kiba wan na Manipur.
“Ka shnong ka la pynbna ba dei ban sangeh shuwa ïa ka jingai wai ïing namar lada pynrung kyrteng, kito kiba wan na Manipur ki lah ban rung lang ha ka thup kyrteng shnong bad kumta kin sa kylla long kum ki nongshong shnong shane. Ngim pdiang shuh wat ïa ki bahaïing jong kito (kiba la sah lypa shane) kiba wan na Manipur ïoh ki kylla nongshong shnong shane. Lada ki wan, ban mih pat…ïa ki, ka long kaba jynjar,” la ong u Assistant Secretary.
Haba pynshai shuh-shuh halor katei ka bynta, u la ong ba ki nongshong shnong ha Madanrting ki la ïa-khleh bad don ruh kiba na kiwei pat ki jaidbynriew kiba la kylla long nongshong shnong ba pura, bad kumta ynda wan shuh sa kita kiwei pat, kan nang buh jingeh arshah ïa ka shnong.
“Kine ki 50-60 ngut ruh kiba dang don, ynda ki la mih, ki dei ban pyntip sha ka shnong. Ïa kiba wan thymmai ngin ym pdiang shuh,” u la ong.
Haba pynkynmaw ba ki nongshong shnong katei ka Jylla (Manipur) haba ki la wan sha Madanrting ha ka 12 tarik jong u bnai ba la dep kim shym la kynjoh ktien ïa ki nongïalam shnong, u Bah Malngiang u la ïathuh ba ha katei ka por, ki la ong ba ki la dep ïakren bad u Myntri Rangbah ka Jylla.
“Kumta na ka liang ka shnong ka la ong ba u Myntri Rangbah u dei ban ai jaka ïa ki. Hadien kane, ngi la lum jingïalang bad ngi la ai por ba ki dei ban mih noh hapoh shi taïew. Bun na ki, ki la mih bad kiba sah mynta ki dei sa tang kito kiba sah bad ki bahaïing jong ki,” u la ong.
Kumba 130-140 ngut ki nongshong shnong ka Manipur ki la wan poi ha Madanrting ha ka 12 tarik jong u bnai ba la dep. Kine ki la sah ha ka jaka sah ba shi por kaba ha Them Basuk, hynrei mynta baroh ki la ïa mih lut.
