Shillong, Jylliew 18:
Ka ilekshon MDC kan sah satang hynriew bnai eiei haduh u Nohprah kaba ki seng saiñ pyrthei ki ju sdang ban pynbna ïa ki kyrtong hashwa ba ka sorkar kan pynbna ïa ka ilekshon ha u Kyllalyngkot 2024. Hynrei ki rangbah na Sohïong-Nongspung konstitwensi ki la bun kiba la pynithuh durkhmat ba ki kwah ban ïakhun ïa ka ilekshon na ka shap u Prah.
Katkum ka jingïoh lum jingtip ki don kumba saw ne san ngut ki rangbah kiba sdang ban pynithuh durkhmat ïalade ban pan tiket na ka seng Voice of the People Party (VPP) na Sohïong-Nongspung konstitwensi ha ka ilekshon MDC ban ïakhun pyrshah ïa u MDC ba mynta na ka seng NPP u Bah Sherborlang Mawlong.
Kane ka jingsdang ban pynithuh ïalade ka dei ha ka jingïalang ka VPP hapoh ka jingïalam u Bah Ardent Basaïawmoit kum u President ki la leit ban pynlong ka jingpynrung dkhot ha ka 14 tarik mynta u bnai ha Sohïong.
Ha kane ka jingpynrung dkhot ki nongkitkam kiba hakhmat jong ka NPP, UDP bad HSPDP na Sohïong konstitwensi ki la leit ban thied ïa ka ‘form’ rung dkhot bad ka ‘form’ ban long ki nongïalam.
Kumta na ka liang ka VPP kan sa jied sa ïa ki nongkitkam nangne shakhmat hadien ba ki ’riew rangbah ki la thied ïa ka ‘form’ na ka bynta ban pynkhlaiñ noh sa ïa ka ilekshon MDC ka ban long ha u Rymphang, 2024.
Wat la ka ilekshon MLA ha Sohïong ka dang shu kut mynta dang shi bnai tam eiei, hynrei kiba bun ki nongkitkam bad ki nongkyrshan ka UDP bad ka NPP ki la leit ban pynïasoh sha ka VPP.
Ha kane ka jingïalang ka VPP ha ka 14 tarik mynta u bnai kiba bun na ki paidbah ki wad ïa u Bah Amazing Kurbah, uba dei uwei na ki khlur ïalap ilekshon kaba dang shu dep na ka UDP. Une u rangbah u dang sngap jar jar namar ka shnong ba u shong u sah kam hap shuh ha ka ilekshon MDC ha Sohïong namar ki hap ban thep ‘vote’ ha Mawphlang-Diengiei konstitwensi.
Nalor ka VPP, ka UDP, NPP, Congress kin pynïeng kyrtong beit ha ka ilekshon MDC ha u 2024.
