Nongstoiñ, Jylliew 18:
Ki nonghikai bad ki nongseng jong ka ‘Kid’s Tarari’ ki la ong ba ka jingduh noh ïa i Cafina Nongsiej (15 snem ka rta) ka la long shisha ka jingduh kaba khraw.
Ka Kong Badahun Nongrum kaba dei ka nonghikai, ha kajuh ka por ka nongseng ïa kane ka kynhun rwai ha ryngkat ka jingdonlang ka Kong Joymery Khardewsaw, Asst. Teacher, ki la ong ba i Cafinia i la pynïasoh sha ka kynhun naduh u snem 2020 jong u bnai Lber bad i long i khynnah iba kohnguh seng.
Ha kaba nyngkong, ki la ong ba i shu wan na bynta ka ‘Personal Class’ bad hadien la pynrung noh ïa i ha ka ‘Kid’s Tarari’ bad i ïoh ban ïashim bynta kylleng-kylleng.
Ki nonghikai ki la ïathuh ruh ba i Cafinia i ju shim ïa ki bynta jong ka surkhmat lane ka ‘Solo’ bad katba ïa ki bynta ban rwai lang i lah beit ban shim namar i dei iba don sap.
Ka Kong Badahun ka la ïathuh ruh ba haduh mynta, ki don haduh 169 ngut ki khynnah hapoh kane ka kynhun rwai.
“Ka dei ka jingduhnong kaba khraw namar i Cafinia lah ban ong ba i dei iba saw lane san iba wan rung bad ka kynhun bad i dei i khynnah iba trei shitom, ba ïaineh bad iba minot bha ha ka kam rwai bad ngi ju ïalam kylleng-kylleng bad i dei ruh iba ngeit sneng bha,” ki la ong.
Ki la ong ruh ba ka jingrwai kaba khaduh ba i Cafinia i la ïoh ban ïashim bynta ka dei kaba kyrteng ‘Thangsharak’.
“Ka jingduh noh ngim lah ban pyrkhat lypa ïa kata, ngi ai mynsiem bad pyntngen ïa ki kmie ki kpa ba kim dei ban don ka jingduh jingkyrmen. Hooid ka dei ka jingduh kaba khraw haba duh noh ïa i khynnah ba don sap khamtam ha ka ‘Kid’s Tarari’, i la dei shisha iba don sap. Hynrei ïa kaei kaba u Blei u thmu ngim lah ban leh eiei bad kumta ngi hap ban pdiang beit ïa kata bad ngi ngeit skhem ba in ïoh ïa ka jingsuk,” la ong ki nonghikai.
Ka Kong Badahun ka la ïathuh ruh ba i Cafinia i kwah ban pynmih ïa kawei ka jingrwai ha ka ‘Channel’ jong i, bad ka ong ïa ki nonghikai ba kin ïarap lem ban thaw ïa ka jingrwai ïa kaba la dep ruh ban thaw bad pynbit-pynbiang nadong shadong bad ha ka jingshisha la dei ban ‘Record’ noh hynrei sngewsih ba wan jia noh kane ka jingjia.
Na ka liang ki bahaïing hasem ki la pyntikna ba ka jingleit on tep ïa ki 2 ngut shipara kan long ha ka 19 tarik u bnai Jylliew, 2023 ha ka por 1.30 mynsngi ha u Lumjingtep ka Balang Presbyterian Mawlangniang.
Lah ban kdew hangne ba ha ka step jong ka 17 tarik u bnai Jylliew, 2023 ha ka por 4.30 baje eiei mynstep, i Cafinia lem bad i para, i Maianylla Nongsiej (10 snem ka rta) ki la khlad noh na kane ka pyrthei hadien ba ki la shah taplup ha ka khyndew kaba la twa ha ka ïing kaba ki sah katba ki dang thiah.
Katei ka la jia ha ka kyntoit jong ka Dommawlien, Pyndengrei West Khasi namar ka jingjur palat u slap, katba 2 ngut kiwei pat ki para kynthei ha ryngkat u kpa kiba sah lang ban leit skul ki la lait im na katei ka jingjia.
