Shillong, Jylliew 18:
Ka Khun Hynñiewtrep National Awakening Movement (KHNAM) ka la bteng ban ther ïa ka Sorkar halor ka rukom pyntreikam ïa ka Roster System da kaba pyndonkam ïa ki jingkheiñ naduh u snem 1972. Nangta, ka la buh jingkylli ïa ki seng saiñ pyrthei kum ka Congress, TMC, HSPDP bad UDP kiba la sngewhun bha ïa ka rukom batai kaba pyni ha ki jingïalang jong ka Sorkar bad baroh ki seng saiñ pyrthei, bad lyngngoh ruh ba ka VPP ka sngap jar ïa ka Roster System.
Ka KHNAM kaba la ïeng naduh basdang ban ïai dawa pynbeit thymmai ïa ka Reservation Policy ka la ong ba ka kyrshan ïa ka VPP haba ïadei bad kane ka jingdawa, tangba ka VPP ka sngap jar haba ïadei bad ka Roster System tang namarba ka pynleit jingmut ïa ka Reservation Policy.
Lah ban pynkynmaw ba ka VPP naduh basdang kam pyrshah satia ïa ka Roster System, hynrei ka dawa tang ban pynbeit ïa ka Reservation Policy, bad ka VPP ka ong ba ka Roster System kam dei ka jingeh, hynrei ka jingeh ka dei beit ka Reservation Policy.
“Hynrei kumba kiei kiei ki long mynta, ka paw ba ka jingpynbeit thymmai ïa ka Reservation Policy ka lah ban shimpor, bad ka jingïakhun ban pyntreikam nangne shakhmat ïa ka Roster System ka long kaba donkam na ka bynta ka jingmyntoi bad jingbha lang jong ki samla ka Jylla,” la ong u Working President ka KHNAM, Bah Thomas Passah ha u kyrwoh ha ka Sngi U Blei.
U Bah Thomas u la ong ba katba ka Sorkar ka dang peit ïa ka jingkheiñ naduh u snem 1972 ban pyntreikam ïa ka Roster System, kane ka dei hi ka jingpyntrei da kaba phai na shadien kaba nang pynkyllaiñ bad pynkulmar jingmut ïa ki paidbah.
Kumta u la ong ba ka KHNAM kan bteng ban pyrshah ïa kane ka rukom pyntreikam ka bym dei hok da kaba leit phai na shadien (retrospective) bad kan bteng ban ïakhun khnang ba ka rukom pyntreikam kan dei beit nangne shakhmat (prospective) kata naduh u Jymmang, 2022 na ka bynta ka jingpyntreikam kaba khuid bad leh hok ïa ki samla ka Jylla.
Haba pynkynmaw ïa ki seng saiñ pyrthei kum ka Congress, TMC, HSPDP bad UDP kiba sngewhun bha ïa ka rukom batai kaba pyni ha ki jingïalang jong ka Sorkar bad baroh ki seng saiñ pyrthei, ka KHNAM ka la ong ba kine ki seng ki dei ban shong pyrkhat ïalade la ki dei kita ki paralok jong ka Sorkar ba ïalam da ka NPP.
Kumta ka KHNAM ka kyrpad ruh ïa ka VPP ba kan ïakhun pyrshah ïa ka jingpyntreikam ïa ka Roster Reservation da kaba phai na shadien bad ki jingktah jong ka ïa kiba bun ki trai muluk kiba wad kam Sorkar ha kane ka Jylla.
Nalor kata, u Bah Thomas u la ong ba haba ïanujor hapdeng ka Office Memorandum (OM) kaba 10 tarik Jymmang, 2022 bad ka OM kaba 14 tarik Jylliew 2023, ki bynta bakongsan kiba don ha kine ki ar tylli ki OM ki long hi kumjuh wat lada ki don khyndiat ki jingpynkylla kum ka jingweng ïa ki kyntien kiba ïadei bad ki kam ba dang sah ban pyndap, bad ka jingong ba ki kyrteng jong baroh kiba bat ïa ki kam ne kyrdan haduh ba pynmih ïa ka jingpynbna kaba mynta (OM), kaba sdang na kiba dang don ha ka kam kat kaba don ei ka jingbuh jingthoh, hynrei ka jingpyntreikam ka dei kaba bteng katkum ki Roster point kiba don.
“Kine ki jingpynkylla ki long ki bym shai ha baroh ar tylli ki OM bad ka jingshisha ka long ba ym don kano kano ka jingbuh jingkheiñ kaba tikna ha baroh ki jingthungkam kiba la leh naduh 1972 haduh 2022,” la ong u Bah Thomas.
U la bynrap ba ka OM kaba thymmai kam batai eiei ba ka roster system kan sdang naduh ka 10 tarik Jymmang, 2022 kaba ïahap bad ka rai kaba la shim ha ki jingïalang jong baroh ki seng saiñ pyrthei kiba la long baroh ar sien. “Ka paw ba ka Sorkar ka dang buhrieh eiei halor ka jinglong kaba shisha jong ka Reservation Roster haba ïadei bad ka rukom pyntreikam. Namarkata, haba ym don ka jingbatai hangno-hangno ïa ka jingot tarik/snem (cut-off date) ban pyntreikam ïa ka Reservation roster, kaba biang eh ban ong ka long ba kane kam dei ka jingpyntreikam ïa ka roster nangne shakhmat,” la kynthoh u Bah Thomas.
