Shillong, Jylliew 19:
U Bah Ronnie V Lyngdoh, uba dei u MLA/MDC ka Congress na Mylliem Konstitwensi bad uba long ruh u Nongïalam ka Liang Pyrshah ha ïingdorbar thawaiñ ka Jylla, u la ong ba ka jingleit ban kyrshan jong ka Congress ïa ka seng National Peoples’ Party (NPP) ha Khasi Hills Autonomous District Council (KHADC) ka long ban ïada ïa ka jaidbynriew na ka jinglah ban wan ka jingsynshar Administrator hapoh ka Council.
Haba sdang ïa ka Dorbar Lyiur jong ka KHADC ha ka 19 tarik, u MDC ka NPP na Rambrai u Bah Bajop Pyngrope u la wanrah ïa ka No Confidence Motion pyrshah ïa ka Executive Committee ba la lamkhmat da ka UDP hapoh ka jingkhlieh jong u Bah Titosstarwell Chyne, kaba la pynlong syndon ïa ka EC u Bah Titos ba kan khyllem noh. Kane ka la wan hadien ka jingkyrshan lang jong ki MDC ka Congress ïa kane ka NC.
Kumta ki 6 ngut ki MDC ka Congress mynta kin ïatreilang bad ki 12 ngut ki MDC ka NPP na ka bynta ban thaw ïa ka Executive Committee bathymmai ha KHADC. Ïa kane ka kynhun ba la thaw thymmai yn tip kyrteng da ka Khasi Hills Democratic Front (KHDF).
Haba kren sha ki lad pathai khubor hadien ka Dorbar lyiur, u Bah Ronnie u la ong ba ka rai ba la shim da ka Congress ka dei na ka bynta ka bha ka miat bad ka jingmyntoi jong ka KHADC bad khamtam lei na ka bynta ban ïada ïa ka jaidbynriew.
“Shu tharai, lada ngim kyrshan ïa ka NPP, ka jingsynshar u Lat kan sa wan hangne,” la ong u Bah Ronnie bad bynrap “Kan kham bha ban ïoh synshar hi ban lait na ka jingwan synshar u Lat, dei namar kane ngi kum ka seng ngi la rai ban kyrshan noh ïa ka NPP”.
U Bah Ronnie u la ong ba lada ka jingsynshar u Lat kan wan shimti, mano shuh ban ïada, pynneh pynsah ïa ki riti dustur, ka hok halor ka khyndew ka shyiap jong ka jaidbynriew Khasi.
“Mynta kan wan sa ka amendment jong ka Sixth Schedule hapoh ka ïingdorbar Parliament, lada ngim don bynta ha ka Amendment, ïoh ka Parliament ka wanrah noh mynta, mano ban peit ïa ka bha ka miat bad ka jingmyntoi jong ngi ha ka riti dustur, ka khyndew ka shyiap,” u la ong.
Shuh shuh u la bynrap “Dei halor kine ki nongrim ba ngi la rai ban kyrshan bad lada wan ka Amendment, ngin ïoh ban ïa ai jingmut bad ïa kaba ngi sngew ïahap ngin kyrshan bad ïa ki bym sngew ïahap ngin pyrshah”.
