Shillong, Jylliew 19:
Kum shi bynta ban ïakhun pyrshah ïa ka jingjyllei jong u drok hapoh ka jylla Meghalaya, ka Sorkar Jylla ka la thaw thymmai biang ïa ka Anti Narcotics Task Force (ANTF) ka ban treikam ruh kum ka State NCORD Secretariat.
Ïa kane ka ANTF kaba la thaw thymmai yn khlieh da u Inspector General of Police (CID) kum u Chairman bad u Assistant Inspector General of Police (Re-Orgn) kum u Member Secretary bad Commissioner of Excise.
Kiwei pat ki dkhot ki kynthup ïa u Deputy Inspector General of Police (Eastern Range), Shillong, Deputy Inspector General of Police (Western Range) Shillong, Superintendent of Police (CID) Shillong, ki Superintendent of Police ka East Khasi Hills, East Jaiñtia Hills bad West Jaiñtia Hills nalor u In-charge ka CELL-X (NDPS), CID Meghalaya.
Kane ka ANTF kan pynleit jingmut halor ki lai tylli ki thong, kita ban shim ïa ki sien jam jingïada pyrshah ïa ka jingkhaïi drok bad shim rai ban leh eiei bad ka jingleit tiañ bishar ïa baroh kynthup ki nongdie drok, ki nongshalan bad nongpynpoi drok, ban pynlong ïa ki jingïalap paidbah pyrshah ïa u drok bad ban pynïoh ïa ka jingïatreilang u paidbah ha ka jingïakhun pyrshah ïa u drok nalor ban ïatreilang bad kiwei ki kynhun/agency/tnat Sorkar na ka Jylla bad Sorkar Pdeng ban lah kynjoh ïa ka thong ba la buh ha ka rukom ka ban noh synñiang sha ka thong ban pynlong ïa ka Ri India kaba lait na u drok.
