Shillong, Jylliew 19:
Ka Myntri ka tnad ka koit ka khiah jong ka Jylla, ka Dr. Mazel Ampareen Lyngdoh ha ka Lah Sngi U Blei ka la pyntip ba ka tnad ka dang pynkhreh ban rah ïa ka jingthoh sha ka jingïalang jong ka Kynhun Myntri ban wad ka lynti kaba bha tam na ka bynta ban pyntreikam ïa ka ‘Shillong Medical College’ (SMC).
Haba kren sha ki lad pathai khubor, ka Dr. Ampareen ka la ong ba ki don katto-katne ki jingai jingmut ïa kiba dang ïakren bad ïatai mynta bad ka la pyntip ba ki don ar jait ki jingai jingmut.
“Kawei ka dei da kaba pyntreikam da ka PPP Mode ïa kaba lah ban pyndonkam da ki kynhun shimet bad kawei pat ka long ban ïoh ïa ka jingïatreilang bad ki nongtrei jong ka Sorkar kiba la don lypa ha nongbah Shillong ne ha kiwei pat ki jaka hajan ka nongbah Shillong, la hato ngi lah ne em ban don ïa ka Medical College ka ban lah ban pyndonkam ïa ka Shillong Civil Hospital, Ganesh Das Hospital, Reid Chest Hospital, la hato ngi long ne em ban pynkylla ïa kitei ki jaka sha ki jaka pule kaba lah ban pynmih ïa ka Medical College na ki jingdon jingem kiba la don lypa hapoh ka jylla,” la ong ka Dr. Ampareen.
Ka Dr. Ampareen ka ong ba ka tnad ka koit ka khiah ka dang peit ïa ka jingai jingmut ban ïatreilang bad ki skulbah kiba la treikam bha hapoh ka Jylla kiba don kum hapoh ka Ri-Bhoi District ban tei ïa ka Medical College.
“Ngi dang peit ruh ïa ka jingthmu ban ïatreilang bad ki skulbah kiba treikam bha hapoh ka jylla Meghalaya lehse khamtam kiba don hapoh ka Ri-Bhoi ha kaba ki don bun ki skulbah jong ki ’riewshimet kiba la treikam lypa, la hato ka long ne em ba kino-kino na kitei ki skulbah kin ïatreilang bad ngi lyngba ka PPP mode bad kane ka long khamtam eh ha kaba ïa dei bad ka thaiñ Khasi-Jaiñtia Hills,” la ong ka Dr. Ampareen.
Shuh shuh ka Dr. Ampareen ka la pyntip ruh ba ka jinglong jingman ka Tura Medical College ka la ïaid shakhmat bad ka la ong ba kan sa leit dalade sha katei ka jaka pule ban jngoh ïa katei ka jaka bad na ka liang ka tnad kan ïaleh ban pyndep kham kloi ïa katei ka jingtei khnang ba kan ïoh treikam noh.
Kumta ka ngeit skhem ba ka Meghalaya kan lah ban ïaid shakhmat kum ka Assam namar ba lada ka Assam ka lah ban leh, ka Meghalaya ruh ka lah ban leh ïa kata.
Shuh shuh ka Dr. Ampareen ka la ïathuh ruh ba dang shen ka la ïoh ban ïakren bad phylliew jingmut ruh bad u Myntri Rangbah ka Assam, u Himanta Biswa Sarma halor ka jingtei bad ka jingpyntreikam pura ïa ki Medical College hapoh Assam.
