Shillong, Jylliew 19:
U Bah Titosstarwell Chyne, uba dei u nongïalam ka United Democratic Party (UDP) bad uba la shah pynhiar noh na ka khet CEM ka KHADC, u la ong ba ka jingpynkhih ïa ka “no-confidence motion” ka long tang ban pynsuk ha ka kam saiñ pyrthei.
“Kam shym la don satia ka nongrim ne kano kano ka jingïohi jngai. Ka jingthmu bad kwah ba hakhmat eh jong ka NPP haba wanrah ïa ka NC ka long tang ban kynjat noh ïa ka UDP,” la ong u Bah Titos.
Haba pynpaw ba lada ki buh jingkylli halor ka rukom treikam, u Bah Titos u la ong ba ki la dei ban wanrah ruh shakhmat ne kdew ïa ki katto katne ki daw khamtam halor kita ki rai ba u la shim hi marwei kum u CEM.
Haba kylli halor ka jingkynthoh hapoh ka ïingdorbar ba kane ka jingleh ka dei kum ka jingshet kylla jong ka NPP, u Bah Titos u la kyntait ban ong eiei shuh shuh.
Haba kylli pat hato kane ka jingleh kan ktah ne em pat ïa ka jingïadei jong ka UDP bad ka NPP, u Bah Titos u la ong, “Ngam don eiei ban ong halor ka jingïadei hapoh ka jylla.”
Shuh shuh u la pyntip ba ha ka jingïalang jong ka UDA kaba la long ha ka taïew ba la lah, ki la don katto katne ki MDC kiba khlem wan mih satia ki bym don hapoh ka EC.
“Ki paidbah ki la ngiah ïa kane ka drama hangne hapoh ka KHADC. Kiba la ong ba ka la don ka jingbthah ban kynjat noh ïa ka UDP. Ngam tip naei kata ka jingbthah ka wan,” u la ong.
Haba pynpaw ba u la dep ban kdew hapoh ka ïingdorbar ba ha ka politik kiei kiei ki lah ban jia bad long beit, u la kdew sha uwei na ki nongïalam saiñ hima uba ïatreilang hapoh ka KHADC bad shong pat ha ka liang pyrshah hapoh ka ïingdorbar thawaiñ ka jylla.
Ha kawei pat ka liang, u Bah Titos u la kynnoh ruh ba u Chairman ka KHADC um shym la bud ryntih ïa ki kyndon ba dei ban ïaid hynrei u la ïaid beit shakhmat bad ka no-confidence motion khlem da shim kam shwa ïa kiwei ki kam kiba la dep ban buh na ka bynta ka sngi.
“Ha ka jingshisha ïa ka NC la dei ban ïakren bad ïatai hadien ba la pyndep lut ïa kiwei ki kam ba la buh ha kane ka sngi. Hynrei hangne ka NC ka la dei ka kam kaba nyngkong ba la shim. Lada dei ka ïingdorbar ba la khot kyrpang, nga la sngewthuh, hynrei kane ka dei ka dorbar kaba la ju pynlong kumba dei,” u la ong.
