Shillong, Jylliew 19:
Ka Executive Committee (EC) ha Khasi Hills Autonomous District Council (KHADC) kaba ïalam da ka United Democratic Party (UDP) bad u Bah Titosstarwell Chyne kum u Chief Executive Member (CEM) ka la khyllem noh lyngba ka mat bym shaniah shuh lane ka ‘no-confidence motion’ kaba la kyrshan lang da ki 17 ngut ki MDC ka National People’s Party (NPP) bad ka Congress ha Ïingdorbar ha ka Lah Sngi U Blei.
Ka jingkhyllem ka EC bad u Bah Titos kum u CEM, la pynbna da u Chairman ka KHADC, u Bah Lamphrang Blah hadien ba ki MDC kiba kyrshan ïa ka EC ki khlem ïeng shuh ha ka jaka shong jong ki kum ka jingkyrshan namarba la bunpaid ki MDC kiba ïeng ban kyrshan ïa ka ‘no-confidence motion’ hapoh Ïingdorbar.
U Bah Titos kum u CEM, u dei ruh uba khlieh ïa ka kynhun synrop United Democratic Alliance (UDA), kaba dei ka kynhun jong ki MDC ka UDP, NPP, HSPDP bad ki MDC shimet ha KHADC.
Ha ka jingshisha ka Dorbar Mang Tyngka ka KHADC ka dei ban sdang ha ka Lah Sngi U Blei.
Hynrei mar ïa sdang ka dorbar, u Chairman u la pynbna ha Ïingdorbar ba u la ïohpdiang ïa ka shithi kaba dei ka ‘no confidence motion’ pyrshah ïa ka EC. Ïa kane ka mat la wanrah da u MDC na Rambrai-Jyrngam u Bah Bajop Pyngrope, uba la pynpaw ba ka EC kaba ïalam da u Bah Titos ka la duh ka jingshaniah.
Kumta hashwa ban pdiang ïa ka ‘no confidence motion’ ha Ïingdorbar katkum ka kyndon, u Chairman u la khot ïa ki dkhot ka Ïingdorbar kiba kyrshan ba kin ïeng bad ki dkhot ka Ïingdorbar kiba kyrshan ïa ka EC ba kin ïeng kum ka jingpyni ïa ka jingkyrshan jong ki.
Hynrei hashwa ba u Chairman un leh kumta, na ka liang u CEM u Bah Titos u la ïeng ban kren bad u la ther ïa ka jingwanrah ïa ka ‘no-confidence motion’ da ki MDC kiba ju donlang bad u, bad u la ong ba u la ‘shahdung nadien’ ha ki MDC kiba u ieid palat.
U Bah Titos u la buh jingkylli ruh kumno ki MDC ka Congress ki ïatreilang bad ka NPP ha KHADC naba ha Jylla pat ka Congress ka don sha ka Liang Pyrshah bad uwei na ki MDC uba dei ruh u MLA, u shah thung kum u Nongïalam ka Liang Pyrshah.
U la pynpaw ruh ka jinglyngngoh namarba ki MDC kiba kyrshan ïa ka ‘no-confidence motion’ bad kiba donlang ha ka EC kim don daw eiei pyrshah ïa u bad dang shen ki la leit lang bad u sha Tripura bad leit jngoh ïa ki paid Khasi Pnar kumjuh ruh ki la leit lang bad u sha nongbah Delhi ha kine ki khyndiat sngi.
Halor ka jingwanrah ïa ka ‘no-confidence motion’ bad ka jingkynnoh u Bah Bajop Pyngrope ba u CEM u la shimrai hi marwei ïa kiba bun ki mat khlem da ka shimlang ïa ki MDC kiba don ha ka kynhun UDA, u la ong ba ki jingkynnoh kim don nongrim namarba ki rai kiba la shim ki dei kiba ïasyllok lang hapoh ka Executive Committee bad u la ong ba kane ka ‘no-confidence motion’ ka dei ka jingleh kaba shet kylla.
Hadien ba u CEM u la kren, u la mih noh na Ïingdorbar.
Kumta hadien ba u Bah Titos u la dep kren, na ka liang u Chairman u la khot ïa ki MDC kiba kyrshan ïa ka ‘no-confidence motion’ ban ïeng ha ka jaka shong jong ki kum ka jingkyrshan, ha kaba ki la ïeng 17 ngut ki MDC kiba kynthup 11 ngut na ka NPP bad 6 ngut na ka Congress.
Haba u Chairman u la leh kumjuh, bad khot ïa kiwei pat ki MDC kiba dang kyrshan ïa ka EC, ym don shuh ki MDC kiba ïeng, hynrei ki la sdang ban mih noh na Ïingdorbar; kaba pyni ba ka EC kam don shuh ïa ka jingbun paid.
Ka KHADC ka don 30 ngut ki dkhot, bad haba 17 ngut ki MDC ki ïeng ban kyrshan ïa ka no-confidence motion, ka la paw shai ba ka EC ka la don ha ka jingrit paid.
Kumta na ka liang u Chairman ka KHADC Chairman u la pynbna ba ka Executive Committee kaba ïalam da u Bah Titos kum u CEM ka la khyllem noh namar ka la duh ka jingbun paidbah.
Namarba ka EC ka la khyllem, u Chairman u la pynbna noh syndon ïa ka sngi thep kyrteng na ka bynta ka ilekshon ban jied CEM thymmai, bad ka sngi ban jied ïa u CEM ha ka sngi ba-ar ha ka por 11 baje mynstep.
U Bah Titos u la shahjied bad shimti kum u CEM ka KHADC ha ka 24 tarik Lber, 2020.
Da ka jingkhyllem ka EC ba ïalam u Bah Titos, ka KHADC kan ïoh ïa ka EC kaba saw hapoh 5 snem naduh ba pynlong ïa ka ilekshon MDC ha u snem 2019.
Ka EC banyngkong la ïalam da u Bah Teiñwell Dkhar, bud sa ka EC ka ba-ar ba ïalam da u Bah Latiplang Kharkongor, nangta ka EC balai ba ïalam u Bah Titos, bad ka EC basaw ban ïalam da u Bah Pynïaid Sing Syiem kum u CEM bathymmai.
