Shillong, Jylliew 19:
Ka Executive Committee (EC) ka Khasi Hills Autonomous District Council (KHADC) ba la ïalam da u Chief Executive Member (CEM), u Bah Titosstarwell Chyne, ka la shah pynkhyllem noh ha ka Lah Sngi U Blei ha ki MDC ka NPP bad Congress wat la ki MDC ka NPP ki la ïatreilang bad kane ka EC mynta la lai snem tam.
Kumba ïuh tdong bseiñ, ki paidbah ki la ïoh jingtip mynta ka step ba u Bah Titos, uba dei u MDC ka UDP na Sohra konstitwensi, u la shah pynkhyllem na ka shuki CEM. Na ki jingkren jong u Bah Titos, la sngewthuh ba une u rangbah nongïalam u la shah shet kylla ha ban da biang, bad na ka liang jong u ruh, u la ong ba kijuh ki MDC kiba u ieid ki la dung ïa u nadien.
Kine ki kyntien u Bah Titos ki pynkynmaw ïa ki kyntien jong u Julius Caesar (Julius Kaisar) ha ka por ba u la shah dung ha ki para dkhot ka ïingdorbar thawaiñ (Senate) ha ka snem 44 BC ha ka jaka ba la tip kum ka “Theatre of Pompey”. Kata ka tarik ba u Caesar u la shah dung ka dei 15 tarik Lber bad la ju tip ïa kata ka sngi kum ka “Ides of March”.
Ha ka por ba u la shah dung, la don uwei u paralok jong u Caesar uba la ïasnoh kti lang bad ki nongshun ïa uba la tip kyrteng kum u Marcus Brutus. Haba u Caesar u la ïohi ba u Brutus u la donkti lang ban dung ïa u, u la kylli ïa u ha ka ktien Latin: “Et, tu, Brute?” Kaba mut, “Ma me ruh, Brutus?” Kine ki kyntien ki long kiba pawnam bad la ju pyndonkam na ka bynta ki paralok kiba kylla long pat ki nongshet kylla hadien habud.
U Bah Titos u la shah jied kum u CEM ka KHADC ha ka 24 tarik Lber, 2020 khlem da donkam ban ïakhun namar ym shym la don kiba ïaleh pyrshah ïa u. U Bah Titos u la mih bujli ïa u MDC ka Nongthymmai, u Bah Latiplang Kharkongor, hadien ba ka Executive Committee ba u la ïalam ka la duh noh ïa ka jingïoh jingshaniah na ka ïingdorbar ka KHADC.
Lah ban pynkynmaw ba u Bah Latiplang u la shah jied kum u CEM ka KHADC ha ka 22 tarik Naiwieng, 2019, bad u la don ha ka shuki tang haduh ka 7 tarik Rymphang, 2020.
U Bah Latiplang u la long kum u CEM hadien ka jingkhyllem noh ka Executive Committee ba la ïalam da u MDC ka UDP na Shella, u Bah Teiñwell Dkhar. U Bah Teiñwell u la long u CEM banyngkong hadien ka ilekshon MDC ha u snem 2019, bad u la shah jied ha ka 7 tarik Lber, 2019 hashwa ba un shah pynkhyllem noh ha ka 20 tarik Naiwieng, 2019.
Na ka snem sha ka snem, ka saiñpyrthei ha ki District Council ka khih phaloh bad ym ju kham don ki CEM kiba lah ban pyndep ïa ka san snem pura na ka daw jong ka jinglong laitlan palat ki MDC da ka jingbymdon ka aiñ ka ban khanglad ïa ka jingkyntiap seng.
Mynta yn hap ban ïa peit u CEM bathymmai un neh haduh ba kut ka ilekshon MDC ha u snem 2024 lane kin dang don sa kiwei pat ki ‘Brutus’.
