Shillong, Jylliew 19:
Ha kawei na ki jingïoh kurup drok Heroin ba bun tam da ki pulit ka jylla, ki pulit ka East Jaiñtia Hills ha ka Lah Sngi U Blei ki la ïoh kem ïa arngut ki briew, uwei uba na Manipur bad uwei na Nagaland. Na kine la ïoh ban kurup palat 2 kilo u drok Heroin bad la antad ba u shongdor kumba T. 10 klur eiei.
Ki pulit ka East Jaiñtia Hills ki la ïoh kem ïa kitei ki arngut ba la tip kyrteng kum u M. Tuanbiaklian Guite, 32 snem, uba na Churachandpur, Manipur, bad u Imliakum Longkumer, 40 snem ka rta, uba na Dimapur, Nagaland katba ki dang wan ha kawei ka kali Tata Winger kaba don ïa u nombor NL 07T 0815.
Ki pulit ki la ong ba ki la ïoh jingtip lypa halor ka ïaid ka ïeng jong kitei ki arngut, bad namarkata, ki pulit ka ANTF bad ki pulit ka thanat Lad Rymbai ki la pynlong ka jingpynap shrip hajan ka BMS Fuel Station, Nongsning.
Ïa katei ka kali la pynsangeh ha ka por kumba 6:15 janmiet, bad haba la khynra, ha ka jingdonlang ki sakhi, la lap ïa 200 tylli ki synduk sabon ba la thep da u ‘powder’. Ha ka jingpeit banyngkong da ki kor ki bor, la shem ba une u ‘powder’ u dei u drok Heroin bad u la don haduh 2.738 kilo.
Kumta na ka liang ki pulit ki la pynrung da ka jingujor ha thanat Khliehriat bad ka jingtohkit ka dang ïaid ban lap shuh sa ïa kiwei pat kiba donkti.
Nalor u Heroin uba 2.738 kilo, la kurup ruh ïa artylli ki Mobile Phone, ka pisa T. 2,500 bad ka kali Tata Winger.
