Jowai, Jylliew:
Ka North Liberty Higher Secondary School, kaba don ha Mookyrdup, Jowai ha ka Sngi Saitjaiñ ka la plie paidbah ïa ka ‘Vocational Course in Agriculture’ ban bsuh ïa ka kam rep ha skul khnang ban hikai ïa ki khynnah ïa ka rep ka riang.
Ha kane kajuh ka sngi, ka skul ka la pynkup burom ruh ïa baroh ki khynnah skul jong ka kiba la ‘pass’ bha ha ka eksamin SSLC bad HSSLC (Arts bad Science) jong une u snem 2023. Ha kajuh ka por, la pynkup burom ruh ïa ki nonglehkai ‘athletic’ kiba ïoh ïa ka takma ksiar bad la sam ruh ïa ki khusnam kyrpang kaba la tip kum ka ‘Creative Minds’.
Ha kaba ïadei pat bad ka ‘Vocational Course in Agriculture’, kane ka jingpule ka dei kaba nyngkong ka ban sdang da ka skul ha Ri-lum Jaiñtia. Ka jingthmu jong kane ka long ban hikai ïa ki khynnah skul ban ïoh jingtip halor ka rep ka riang, ban thung ïa ki syntiew bad haduh u pud ba kin lah ban pynmih ïa u mar rep bad ban die sha ïew.
U kongsan ha kane ka sngi u long u Symbud Myntri Rangbah ka Jylla, u Bah Sniawbhalang Dhar ha ka jingdonlang ka Symbud Kongsan, ka Kong A.P. Syiem, District School Education Officer, West Jaiñtia Hills District, u District Sports Officer, West Jaiñtia Hills, u Bah Khroobok Passah, u Dolloi Elaka Jowai, u Bah Puramon Kynjing nalor kiwei-kiwei.
U Principal ka skul, u Bah Richard B. Uriah u la pynbna ba ki 10 ngut ki khynnah skul kiba la ïoh palat 80% kin ïoh ïa ka baibam ne kiba ïoh rung klas ha ka XI Science khlem da hap ban siew eiei.
U la ïathuh ruh ba uwei pat u khynnah ïalehkai, u Kynsai Bareh uba pule ha kane skul na ka ‘Sport Quota’ hadien ba u la pyndep bad leh bha ïa ka matrik bad namar ba u don ka jingthrang ban pule da ka ‘Science Stream’, u la ïoh biang ban bteng ïa ka jingpule ha kane ka skul da ka baibam.
Ha kane ka kynti ki don haduh 93 ngut kiba shah pynkup burom ha ka SSLC, 61 ngut ha ka HSSLC (Arts) bad 53 ngut ha ka HSSLC (Science).
Kine ki kynthup ïa ki 3 ngut kiba rung ha ka ‘First Twenty’ na ka SSLC – Reesa Ee Christine Suting kaba la wan ha ka kyrdan 11, u Mendelson M. Langstang uba la wan ha ka kyrdan 14 bad ka Rilanaika Sari kaba la wan ha ka kyrdan 20. U Bah Richard u la ïathuh ruh ba ha kaba ïadei bad ka ‘Coaching NEET’ bad ka ‘JEE Main’ ka dang ïaid shakhmat ha kane ka skul. U la ong ba 6 ngut ki khynnah skul ki la ïoh pule da ka ‘Quota’ ban pule MBBS hadien ba ki la pass ïa ka ‘Entrance’ bad bun bah ki khynnah skul na kane ka skul kiba pule haka laiñ ‘Engineer’.
U kongsan, Bah Sniawbhalang Dhar u la ïaroh ïa u Principal ka skul uba la kylla long u nonghikai na u ‘Engineer’ ban sam ka jingnang jingstad kaba bha tam ha Ri-lum Jaiñtia bad u la kitok kitrwiang ïa ka skul bad ki nonghikai ban nangtrei shitom shuh shuh ha ka ban sam ïa ka jingnang jingstad ban mih ki khraw pyrkhat haka imlang ka sahlang.
Haba kyntu ïa ki khynnah skul u la ong ba ki khynnah ki dei ban don ka mynsiem ïakhun ban jop ha ka jingpule puthi bad ban long kita ki myntoi ha ka imlang ka sahlang.
