Nongstoiñ, Jylliew 19:
Ïa ka met kaba dang sah jong ki ar ngut shipara, ka Cafinia Nongsiej kaba dei ruh ka dkhot jong ka kynhun rwai Kid’s Tarari Choir lem bad ka para ka Maianylla Nongsiej kiba la khlad noh hadien ka jingshah taplup ha ka jingtwa khyndew kaba la jia ha ka step jong ka 17 tarik u Jylliew, 2023 ha Pyndengrei, la pyndep ïa ka jingleit on tep donburom ha ka 19 tarik u Jylliew 2023 wat hapdeng jinghap jong u slap.
Ha kane ka sngi ha shuwa ban rah noh ïa ka met kaba dang sah jong kitei ar ngut sha u lum jingtep, ka Balang Presbyterian Mawlangniang, West Khasi Hills ka la pynlong ïa ka jinglehniam bad lehburom kaba khatduh ha phyllaw ïing jong kitei ar ngut shipara ha ka shnong Mawlangniang ha kaba u Rev. J.T Khardewsaw u la long u chairman.
Shuh shuh ha kane ka jingleh burom khatduh, la ïoh ruh ïa ki jingkren na ki bahaïing, ka skul St. Peter Higher Secondary, na ka kynhun ka Kid’s Tarari, na ka Jingïaseng Samla Balang Mawlangniang, ka jingrwai na ka ïing ka sem bad la ïoh ruh ïa ka jingpule na ka ktien U Blei da u Tymmenbasan P Marthong, la ïoh ruh ïa ka jingïasyllok pyntngen na u chairman u Rev. JT Khardewsaw.
Katba ha u lum jingtep pat ïa ka jinglehniam kaba khatduh, u Tymmenbasan M Mawlieh u la long u chairman bad uba la pyndep ruh ïa ka jinglehniam.
Ha katei ka sngi ki heprit na ka Kid’s Tarari ha ryngkat ka jingtuid ki ummat ki la rwai ruh ïa ka jingrwai kaba kyrpang na ka bynta katei ka sngi. La ïohi ruh ba ki paidbah kiba wan ban sngewlem sha ka ïing ka sem jong kitei ar ngut shipara ki la ïam paid dohnud hadien ka jingsngap ïa ka jingrwai ba la rwai da ka kynhun Kid’s Tarari ka kynhun ba ka Cafinia ka la don bynta lang.
Nangta, ha katei ka jingleh burom kaba khatduh, sa shisien pat ki heprit bad ka kynhun na ka Kid’s Tarari Choir ki la rwai biang ïa ka jingrwai “Mynsiem ba dang lung” kaba dei ka jingrwai ba i heprit Cafinia Nongsiej i la ïadon bynta lang ban rwai bad katei ka kynhun ha ka por ba i dang don ha sla pyrthei.
Na ka liang ki bahaïing haba pynsngew ïa ka khana pateng (history) jong kitei ki heprit (ka Cafinia Nongsiej bad ka Maianylla Nongsiej) ki la pynpaw ba ka Cafinia bad ka Maianylla Nongsiej ki dei ki khun jong ka Kong Bitiful Nongsiej bad u Bah Alexander Lyngdoh Nonglait.
Shuh shuh la ïathuh ruh ba ka Cafina ka dei ka khun kaba nyngkong bad la kha ïa ka ha ka 3 tarik Naitung, 2007 bad ka Maianylla ka dei ka khun ba lai bad la kha ha ka 15 tarik Ïaïong, 2013 bad ki don saw ngut shipara kynthei.
La pynpaw ruh ba ka Cafina ka long khynnah kaba smat ba sting bad kaba kohnguh sneng ïa ki kmie ki kpa bad ka ieit bad sngewtynnad bha ban rwai bad man ka janmiet sngi saitjaiñ haba ka don ha la ïing ka ju ïalam ïa la ki para ban rwai ïa ki jingrwai niam. Ka ju ïashim bynta shitrhem ha ki jingrwai ha ki jingïaseng kiba ka Balang ka pynbeit bad ka dei ruh ka dkhot jong ka Kid’s Tarari bad ha kane ka kynhun ka la ïashim bynta ha ki lai tylli ki jingrwai, kita kaba nyngkong ka long ‘You Say’, ‘Mynsiem Ba Dang Lung’ bad kaba lai ‘Thang ïa ka Sharak’.
La ong ruh ba ka Cafinia ka la don ka jingthmu ban pynmih kawei ka jingrwai shaphang ka Ribaibal bad ïa kane ka jingrwai yn ïarwai lang bad ki kmie lem bad ki bahaïing hasem.
Ha kaba ïadei bad ka Maianylla Nongsiej pat la ïathuh ba ka long ka khynnah kaba jai-jai, kaba tip-sngi bad minot ha ki jingpule. Ka dei ka khynnah kaba ieit bad kohnguh ïa la ki hynmen, ki para bad ki kmie ki kpa.
La ong ruh ba ka Maianylla ka don kawei ka jinglong ba kyrpang bad kata ka long ba ka ieit eh ïa ka para bad lada ka don jingbam tang khyndiat kam ju bam shuh ïalade hynrei ka rah bad ka ai sha ka para ba kan bam.
