Tura, Jylliew:
Ka A·chik Literature Society (ALS) dang shen ka la pyllait ïa ka kot ki khana lyngkot banyngkong jong u nongthoh Garo, u Mukthi R. Marak ba la ai kyrteng, “Mingsa Katta Dongachim aro Gipin Golporang” ha ka jingïalang kaba la long ha Mason Phillips Academy.
Ïa katei ka kot la pyllait da ka Prof. Caroline R. Marak, President ka ALS.
Haba ai jingkren, ka President ka la pynkynmaw ïa u Aristotle halor ka jingshem jong u ïa ka jingkordor ka thoh ka tar da kaba ïanujor bad kiwei pat ki tnad pule kum ka ‘history’.
Ka la sam ïa ki jingïohi jong ka haba ïadei bad ka rukom thoh ‘Prose’, bad ka ktien ba la pyndonkam da u nongthoh, kumjuh ka jingïasnohlang ha ka ban pynwandur ïa ka khana.
Ka la bynrap ba ki bynta ba ïadei bad ka jingkynthup ïa ka jingsammut na ka liang u nongthoh, ki bynta ba ïadei bad ka jingkyndit bad ka jingbym lah ban tip kaei ka ban sa jia kan ïai pynneh ïa ka jingsngewtynnad ha ki nongpule.
U dkhot ka ALS bad A·chik Publisher Society, u Seming D. Sangma, haba ai khublei ïa u nongthoh u la ong ba ki jingthoh ki mih na ka jingshem mynsiem lem bad ka jingmut jingpyrkhat bad ka dawa ïa ka jingminot na ka liang u nongthoh. Ka thoh ka tar ka pashat jingmut halor ka jingim; ki nongpule ban sa wan kin sa shem ïa ka jingim ha ka juk ki phew snem ba ha shuwa jong ka kylla hajar snem kaba ar ha kine ki jingïathuh khana.
U Deacon ka Tura Baptist Church, u Sengbat G. Momin, u la ong ba ka jingpynmih ïa kine ki kot jingïathuh khana kan ai mynsiem ïa ka pateng ban wan ha ka ban thoh ïa la ki jong ki jingthoh.
U Wilberth D. Marak, u para nongthoh kot, u la pynpaw ka jingkmen halor kane ka thup ki jingïathuh khana khamtam na u nongthoh u ban nang kiew ha kane ka laiñ ban synñiang sha ka thoh ka tar ki Garo.
Shuh shuh u Dr. Bilnang K. Sangma, Assistant Professor, Williamnagar Government College, u la ong ba ki nongthoh A·chik mynta ki la jan ïabeh bad ka CIIL, Mysore bad Sahitya Akademi, New Delhi.
Na ka liang u nongthoh jong ka kot, u Mukthi R. Marak, u la kren shaphang ka jingïaid lynti jong u kum u nongthoh kot; ba u ju sngewtynnad ban sngap ïa ki jingïathuh khana, ka jingpyrshang jong u ban pynwandur ïa ki jingïathuh khana kum u khynnah hynrei u don ka jingsngew ba um lah ban ïa ryngkat bad ki nongthoh ba paw ha ka ktien Garo.
Hynrei haba ki katto-katne ngut ki paralok ki la pynpaw ka jingkheiñ kor ïa ki jingthoh jong u, u la ïoh mynsiem. Ki jingpyrshang jong u ki la ïalam sha ka ban pynmih ïa kane ka kot jingïathuh khana lyngkot wat la kham ha shuwa u la artatien ïalade la ki nongpule kin pdiang ne em ïa ki khana jong u.
