Jowai, Jylliew:
Ka shlem treikam jong u Superintendent of Police, West Jaiñtia Hills ha ka 17 tarik Jylliew ka la pynlong ïa ka jingïalang pynsngewthuh paidbah ban ïakhun ïa ka jingkyrni ha ka jingdih drok bad khaïi be-aiñ.
Ïa kane ka jingpynsngewthuh paidbah la pynlong ha Ïawthymme, Ladthadlaboh, Jowai ha ka jinglamkhmat u Officer Incharge Jowai Police Station, u S. Mannar.
La ïatreilang bad ka Mih-Myntdu Community Social Welfare Association, MCSWA kaba pynïaid ïa ka projek ka Meghalaya Aids Control Society kaba la tip kum ka ‘Targeted Intervention’ ne ban ïit bniah ïa ki briew kiba don ha ka jingma kum kiba kyrni ha u drok bad kiba shongkha klumar, ki IDU bad FSW kiba lah ban bit ïa ka jingpang HIV.
Ha kane sngi la ïoh ruh ka jingkren na u dkhot ka MCSWA, u Bah H. Syngkon uba la kren halor ka jingshem jong u bad kumno ruh u la lah ban pynduh na ka jingkyrni ban dih drok.
Ka Kong D. Challam ka la batai ïa ka jingtreikam jong ka MCSWA bad ïa u dawai ban lait na ka jingkyrni ban dih ïa u drok.
La ïoh ruh ka jingkren na u OC Jowai, Bah S. Mannar, OC Women PS, Ibashisha Kharpran, Traffic Incharge, D. Lamare bad kiwei-kiwei. La sam ruh ïa ki kot lyngkdop ban batai sha ïa ka jingma bad jingsniew jong u drok.
