Shillong, Jylliew 19:
Hadien ba ka Executive Committee kaba ïalam da u Bah Titosstarwell Chyne ha Khasi Hills Autonomous District Council (KHADC) ka la khyllem noh, ka kynhun kaba thymmai jong ki MDC hapoh ka jingïalam ka National People’s Party (NPP) la thaw mynta ka sngi ka 19 tarik Jylliew, 2023 bad ka kyrteng jong kane ka kynhun kaba thymmai la tip kum ka Khasi Hills Democratic Front (KHDF).
U MDC ka Sohryngkham, u Bah Pynïaid Sing Syiem u la shahjied kum u Chairman ka KHDF kaba kynthup ïa ki MDC ka NPP bad Congress.
Haba kren sha ki lad pathai khubor, u Bah Pynïaid uba la thep kyrteng na ka bynta ka ilekshon ban shahjied kum u Chief Executive Member (CEM), u la ïathuh ba hadien ba la khyllem noh ka Executive Committee, la thaw ïa ka KHDF ba kan ïalam ïa ka Executive Committee kaba thymmai ha kaba ma u, u la shahjied kum u Chairman ka KHDF bad u Bah PN Syiem kum u Vice-Chairman.
U Secretary ka KHDF u dei u MDC ka Mawlai, u Bah Teiborlang Pathaw bad u Assistant Secretary u dei u MDC ka Mawkynrew, u Bah Carness Sohshang.
U Bah Pynïaid u la batai ruh ïa ka jingleit thep kyrteng jong u na ka bynta ka ilekshon CEM ka ban long ha ka sngi Ba-ar ha ka por 11 baje mynstep.
Haba kylli halor ka jingkhyllem ka EC kaba ïalam da ka United Democratic Party (UDP), u Bah Pynïaid u la ong ba ki MDC kiba don ha KHADC kim dei lut na kajuh ka seng saiñ pyrthei, namarba ki MDC jong kano-kano ka seng ruh ki lah ban ïatreilang ban thaw ïa ka Executive Committee.
U Bah Pynïaid u la ong ba ka UDP ka la ïalam la saw snem ïa ka Executive Committee, bad lada dei ba ka NPP ka rhah bor kumba la shah kynnoh, ka NPP ka la dep don lypa ki nombar la kham slem, hynrei ym dei ba ka NPP ka rhah bor.
U la ong ba ka daw hi kumba la kdew ha ka no-confidence motion ka dei ka jingbymhun ïa ka rukom treikam.
U la ong ba ka nongrim hi ka dei ka mynsiem jingkitkhlieh, bad ïa ka kam kaba dei jong ka Council dei ban pynïaid shakhmat.
Halor ka jinglyngkot ka por ban treikam ka Executive Committee sa tang hapoh shisnem namar kan sa wan noh shen ka ilekshon ha u snem 2024, u Bah Pynïaid u la ong ba kam da dei eh katno ka por ka Executive Committee kan ïoh ban trei, hynrei kaba donkam ka long kumno ka Executive Committee ka trei nangne shakhmat ban rah ïa ka Council kham shalor.
U la ong kum ki MDC ki don la kajong ka jingkitkhlieh, bad ka Council ka lah ban ïatrei badno badno ruh.
U Bah Pynïaid u la ong ruh ba ka District Council hi ka dei ka bor kaba treikam laitluid, ki MDC ruh ym dei ba ki shahteh ne shah hukum, hynrei ki trei bad ki shim rai ruh da maki halor ka nongrim ka jingkitkhlieh.
