Tura, Jylliew:
Ka All Meghalaya Minority Students’ Union (AMMSU) ka la thoh sha u Deputy Commissioner ka West Garo Hills (WGH) ban kyrpad khmih bniah ïa ka thup kyrteng ki nongïoh jingmyntoi hadien kaei kaba ki la kam ba bun na ki nongïoh jingmyntoi kiba dei hok ban ïoh ki la shah kyntait (ban ïoh jingmyntoi) na ka skhim PMAY.
Ka AMMSU ka la kdew ruh ba kito kiba la shah kyntait na ka skhim ki kynthup ïa ki longkmie ba la khlad noh u kurim, kiba duna dkhot met – baroh kiba hap hapoh ka thup kyrdan BPL.
Ha ka dorkhas ba la aiti ha ka Sngi Thohdieng, ka seng ka la ong ba kitei ki nongïoh jingmyntoi ki la pynrung kyrteng hapoh ka PMAY – Awas Plus katkum ka ‘Geo-tag’ jong ka Selsella C&RD Block. Hynrei kat kum ka jinglum thup ka MIS kaba dang ïaid ka la buh ïa ki ha ka thup ba shah kyntait wat hapdeng ka jingdonkam hok na bynta ka ïing ka sem hapoh jong kane ka skhim.
“Ki dei ki nongïoh jingmyntoi kiba dei hok ban ïoh bad nga kyrpad ïa phi ban tohkit bad pynneh biang ïa ki kyrteng jong ki ha ka MIS namar ki sah la ki jong ki jaka kiba i-sangsot bad kan myntoi shi kat dei na kane,” ong u President ka AMMSU, u Nur Islam.
