Shillong, Jylliew 19:
Ka kynhun ki nonghikai na Ri-lum Jaiñtia bad kynthup ïa ka Jaiñtia Hills Lower Primary School Teachers Association (JHLPSTA), Khliehriat Unit bad ka Meghalaya SSA School Association (MSSASA), East Jaiñtia Hills District Unit ha ka Lah Sngi U Blei ka la phah jingthoh sha u Deputy Commissioner ka East Jaiñtia Hills, u Abhilash Baranwal halor ka jingpyntreikam ïa ka ‘GPS Map Camera App’ bad ka ‘Ubiattendance App’ ka ban peitngor ïa ka jingwan skul jong ki nonghikai.
“Ka Joint Executive Committee jong ka JHLPSTA (Khliehriat Unit) bad MSSASA (East Jaiñtia Hills District Unit) kaba la long ha ka 19tarik mynta u bnai hadien ka jingïatai sani bha, da kawei ka sur ka la rai ban pyrshah jur ïa ka jingpyntreikam ïa ka ‘Ubiattendance website/App’,” la ong ki 2 seng ha ka jingthoh ba la phah sha u DC.
Haba pynshai ïa katei ka jingpyrshah, ki nongïalam ki 2 seng ki la ong ba ka ‘Ubiattendance Website/App’ ka dei ka ‘software’, ba la pynwandur, long trai bad pynïaid da ka ‘Ubitech Solution Pvt. Ltd’, kaba dei ka kompeni shimet bad kam dei satia ka ‘website’ jong ka tnad pule-puthi ka Sorkar Jylla ne jong ka ophis u Deputy Commissioner, East Jaiñtia Hills District bad kane ka ‘Website/App’ kam dei hapoh ka jingkhmih jong ka tnad pule-puthi ka Sorkar Jylla.
“Ka ophis jong phi kam shym la ïoh pdiang ïa ka jingbthah ne jingpynbna na bynta ka jingpyntreikam ïa ka ‘Ubiattendance Website/App’ na ki bor ba halor jong ka tnad ba dei khmih bad ïa ka ‘website/ App’ la pyntreikam tang ban buddien ïa ka jingwan skul jong ki nonghikai bad ym ka jingwan skul jong kiwei pat ki nongtrei ha kiwei-kiwei ki tnad treikam hapoh u pud u sam jong ka East Jaiñtia Hills – kata ruh khlem da pan jingbit ne jingmynjur na ka tnad pule-puthi, ka Sorkar Jylla,” la ong ki nongïalam ki 2 seng.
Ki la kdew ruh ba ka Sorkar Jylla lyngba ka tnad pule-puthi ka la sdang ïa ka TIMS (Teacher Information Management Systems) – ‘centrally hosted web-based application’ ha kaba ka jingwan skul jong ki nonghikai ka long kawei na ki bynta jong ka.
Halor ka “Vidya Samiksha Kendra (VKS)”, ba la pynsngew da u Myntri ka tnad pule-puthi, u Rakkam A. Sangma – ka sienjam jong ka tnad pule-puthi ka Sorkar Pdeng kaba thmu ban pynïasoh lang ïa ki ‘App’ bapher-bapher jong ka Jylla kum ka TIMS, MLEAD bad kiwei-kiwei bad ka ‘VKS’, ha kajuh ka por ban pyntreikam ha kylleng ka Jylla, ki nongïalam ki 2 seng ki sngew ba lada ka Sorkar Jylla ka dang ïaid shakhmat ban wanrah ïa ka VKS, balei pat ka ophis u Deputy Commissioner, East Jaiñtia Hills ka kyrkieh ban pyntreikam ïa ka ‘Ubiattendance Website/App’ hapoh ka distrik bad balei ym ap haduh ban da pyntreikam ïa ka VKS.
“Lada ïa ka ‘Ubiattendance website/App’ khlem pyntreikam ha kiwei ki distrik ka Jylla, balei pat ha East Jaiñtia Hills District,” la buh jingkylli ki nongïalam.
Haba ban biang ïa ka jingpyrshah jur ïa ka ‘Ubiattendance Website/App’, ki la ong ba ki nonghikai kin ïai bteng ba nym pyndonkam ïa katei ka ‘App’ kum ka dak jong ka jingpyrshah.
Shuh shuh ki la bynrap, “Ngim pyrshah ïa ki sienjam ba la shim ban pynbha ïa ka pule-puthi ha ki kyrdan jong ka distrik ne ka jylla baroh kawei, hynrei ngi pyrshah ïa ka jingpyndonkam bad jingpyntreikam ïa ka ‘Website/App’ ba la long trai bad khmih da ka kompeni shimet bad ym da ka tnad pule-puthi ka Sorkar Jylla. Kumta ngi kyrpad ïa phi ban pynsangeh noh ïa ka jingpyntreikam jong ka ‘Ubiattendance Website/App’.”
