Shillong, Jylliew 19:
Wat la ka Executive Committee kaba ïalam da ka United Democratic Party (UDP) ka la shah pynkhyllem noh ha Khasi Hills Autonomous District Council (KHADC), hynrei ka UDP kan dang bteng ban donlang ha ka Sorkar Meghalaya Democratic Alliance (MDA-II) kaba ïalam da ka National People’s Party (NPP).
Ka Executive Committee ha KHADC kaba ïalam da u Bah Titosstarwell Chyne kum u CEM, ka la shah pynkhyllem noh da ka jingïatreilang hapdeng ki MDC ka NPP bad ki MDC ka Congress ha ka Lah Sngi U Blei, kaba dei ruh ka sngi sdang ka Dorbar Mang Tyngka jong ka KHADC.
Hadien kane ka jingjia ha KHADC, na ka liang u Bah Titos lem bad ki MDC ka UDP ki la ïakynduh ïa ki nongïalam bahalor ka seng kynthup ïa u President, u Bah Metbah Lyngdoh ha ka por janmiet. Ha kane ka jingïakynduh ki la pynsngew ïa ka jinglong jingman ha KHADC ha kaba ka UDP kaba ïalam ïa ka EC la 4 snem, ka la shah weng noh wat haba ka dei ka paralok kaba donlang ha ka Sorkar Jylla.
Haba kylli na u Bah Metbah halor kane ka jingjia khamtam halor ka shah kyntait ka UDP ban donlang ha KHADC, u la ong ba kaei kaba jia ha KHADC yn sa pynsngew sha ki nongïalam ka NPP kynthup ïa u Myntri Rangbah, u Conrad K Sangma namar ym tip kaei ka daw, bad yn sa kylli na ki halor kane.
Haba kylli la kane ka jingkylla ka saiñ hima ha KHADC kan ktah lang ïa ka jingïadei ka UDP ha ka Sorkar Jylla, u Bah Metbah u la ong, “haba ïadei bad ka Sorkar Jylla, ym don eiei kano-kano ka ban ong ba ngin nym ïatrei lang shuh.”
U la ong ruh ba kan nym don ka jingktah ïa ka UDP ha Jylla.
U la ong ba ha ka jingshisha katkum ka jingïapynbeit naduh u snem 2019, ka UDP ka dei ban ïalam ïa ka Executive Committee ha KHADC, hynrei ïa kane ka jingjia na ka liang ka UDP kam shym la tip bad ym don kano-kano ka jingpyntip.
“Ngin sa pynsngew ïa kane sha ki nongïalam (NPP) ha Jylla tangba ngin ieh ruh ha ki MDC jong ka seng haba ïadei bad ka kam ha KHADC. La 4 snem ka EC ka ïaid beit hapoh ka jingïalam ka UDP, hynrei kane ka shu jia kyndit khlem kano-kano ka jingtip,” la ong u Bah Metbah.
Kumta u la ong ba ka UDP kan sa pynsngew sha ki bor bahalor ka NPP bad kwah ban tip ïa ka daw halor kane ka jingkylla kaba jia ha KHADC.
