Shillong, Jylliew 20:
Ka Election Commission ka Ri India (ECI) ha ka Sngi Ba-Ar ka la pynmih ïa ka thup ba don ki jingai jingmut na ka bynta ban pynbeit thymmai ïa ki konstitwensi ha Assam ba kynthup ïa ki konstitwensi na ka bynta ka Ïingdorbar Thawaiñ ka jylla Assam bad ki konstitwensi na ka bynta ka Lok Sabha.
Na ka bynta ka jingpynbeit thymmai ïa baroh ki konstitwensi Assembly bad Lok Sabha, la leh katkum ki jingkheiñ jingdiah jong ka jingdon briew (Population) jong ka khanasamari (Census) u snem 2001.
Katkum ka jingai jingmut jong ka Delimitation Commission, la pynneh, hynrei la pynbeit thymmai, ïa ki 126 tylli ki konstitwensi Assembly bad 14 tylli ki konstitwensi Lok Sabha. Ka ECI ka la ong ba ka jingdon jong ki konstitwensi kan ym kylla tat haduh ban da lah ban pyndep ïa ka khanasamari hadien u snem 2026.
La ai jingmut ba 19 na ki 126 tylli ki Assembly konstitwensi bad 2 na ki 14 tylli ki konstitwensi Lok Sabha yn ai bhah na ka bynta ki Scheduled Tribe. Ha kajuh ka rukom, 9 tylli ki Assembly konstitwensi bad kawei na ki Lok Sabha konstitwensi la bhah na ka bynta ki Scheduled Caste.
Shuh shuh la ai jingmut ban pynkha sa kawei ka Assembly konstitwensi ha West Karbi Anglong distrik; ban pynkiew ïa ki Assembly konstitwensi ha Bodoland na ka 16 sha ka 19 tylli, ban pynneh ïa ka Diphu bad Kokrajhar Lok Sabha konstitwensi kum ki konstitwensi ba la bhah na ka bynta ki Scheduled Tribe, ban bteng ban pynlong ïa ka Lakhimpur Lok Sabha konstitwensi kum ka konstitwensi ka bym bhah ïa kino-kino ki jaitbynriew (Unreserved).
Nalorkata, la ai jingmut ba kawei ka Lok Sabha konstitwensi ba la ai kyrteng kum ka ‘Diphu’ kan long kaba la bhah na ka bynta ki Scheduled Tribe bad kan kynthup ïa ki hynriew tylli ki Assembly konstitwensi na ki lai tylli ki Autonomous District.
La ai jingmut ban ai artylli ki Lok Sabha konstitwensi sha ki distrik kiba don ha Barak Valley, bad kine ki distrik ki dei ka Cachar, Hailakandi bad Karimganj. La ai jingmut ruh ban buh ïa ka Lok Sabha konstitwensi ka ban tip kum ka Kaziranga.
Hadien ba la pynmih ïa kane ka thup jingai jingmut, u Chief Election Commissioner, u Rajiv Kumar ryngkat bad ki Election Commissioner, u Anup Chandra Pandey bad u Arun Goel, kin leit sha Assam ha u Naitung 2023 ban pynlong ïa ka jingsngap paidbah (Public Hearing) halor kitei ki jingai jingmut ba la pyllait mynta ka sngi.
Ka Election Commission ka la ong ba kan pdiang ïa ki jingai jingmut lane ki jingpyrshah halor kitei ki jingai jingmut haduh ka 11 tarik Naitung, 2023.
