Shillong, Jylliew:
Ka Voice of the People Party (VPP) ha ka Lah Sngi U Blei ka la ai jingmut ïa u Myntri ka tnad Animal Husbandry & Veterinary ka Sorkar Jylla, Bah A.L. Hek ban thaw da ka kynhun ki doktor mrad na bynta ban peit bniah ïa ki pham ri masi haba ïadei bad ka jingpang at-sniehdoh ne ka ‘Lumpy Skin Disease’ (LSD).
“Ka seng ka pynpaw ka jingsngewkhia kaba jur halor ka jingpang LSD kaba la ktah shi kat dei ïa ki masi bad kumjuh ïa ki nongshong shnong kiba don bynta ha ki kam ri jingri,” la ong u General Secretary ka VPP, Dr. Ricky A.J. Syngkon ha ka dorkhas ba la phah sha u Myntri ka tnad Animal Husbandry & Veterinary ka Sorkar Jylla, Bah A.L. Hek.
Haba ïaroh ïa ki sienjam ba la shim da ka tnad treikam ban tehlakam ïa katei ka jingpang, ka seng ha kajuh ka por, ka kwah ban ai jingmut kum shi bynta ban ïarap kyrshan ïa ka lad kamai jong ki nongrep ri masi, nongpynbiang bad nongdie doh masi kumjuh ki nongai dud nalor ka jingpynbiang ïa ki jingdonkam jong u paidbah.
Halor katei, ka seng ka la ai jingmut ïa u Myntri ba dei ban ai ïa ka bai lut-ksan kaba biang sha ki nongrep ri masi, nongpynbiang bad nongdie doh ha kum kane ka por, da kaba buh jingmut ba ka lad kamai jong ki, ka la shah ktah ha ka rukom ba dei.
“Kaba ar ka long ban thaw ïa ka kynhun ki doktor mrad napoh ka jylla lem bad kiwei ki tnad ka Sorkar Pdeng (kum ka ICAR) ban ïaid shakhmat bad ka jingpeit bniah ha ki pham ri masi bad ban pyntikna ïa ka jingdon ne jingbym don jong ka jingpang,” la ong utei u nongïalam.
Haba ïadei bad ki pham ha kaba ki masi kim shah ktah ha ka jingpang, ka seng ka la ai jingmut ba ka tnad ba dei khmih ne kano-kano ka tnad Sorkar ka dei ban pynbiang ïa ka syrnot sha uta u nongrep ri masi (ne Supplier) bad ban shah ïa ki ban pyntyllun ïa ki kam kumba ju long.
Shuh shuh u Dr. Syngkon u la bynrap ba namarba ka jingsaphriang jong ka jingpang ka ktah ïa ki trai bad nongrep ri masi na ka por sha ka por, kumta ka jingwanrah ïa ka ‘Insurance Scheme’ kan pynbiang ïa ka jingshngaiñ bad jingïada haba ïadei bad kano-kano ka jingduhnong kaba ki nongrep ki lah ban ïakynduh, ha kajuh ka por da kaba ai bor ban pyntikna ïa ka jingïai bteng bad jingkiew jong kane ka tnad ba kongsan.
