Shillong, Jylliew:
Ka Hynñiewtrep Youths’ Council (HYC), West Khasi Hills District ha ka Lah Sngi U Blei ka la leit ban ïakynduh bad buh jingthoh ha ka Myntri ka tnad ka koit ka khiah, ka Dr. M. Ampareen Lyngdoh halor ka jingduna ki kam pynroi ha liang ka koit ka khiah ha ka thaiñ West Khasi Hills District.
Haba kren sha ki lad pathai khubor hadien ka jingïakynduh ïa ka Myntri, u President ka HYC West Khasi Hills District, u Bah Lumlang Kharsyiemlieh, u la ong ba wat la katei ka distrik ka dei ka distrik kaba la rim tam hynrei haba phai pat sha ka liang ka roi ka par khamtam ha kaba ïadei bad ka koit ka khiah ka dang duna shibun eh.
U Bah Lumlang u la ong ba ka HYC ka la ju dawa ïa kane naduh u snem 2017 ha kaba ki la ïaid kjat naduh na Nongstoiñ haduh Shillong kumba 89 kilomitar na ka bynta ki jingduna ha ka liang ki kam pynroi ka koit ka khiah ha ka thaiñ West Khasi Hills.U la ong ruh ba ka seng ka la wan dawa na ka Sorkar lyngba ka Myntri ba ka dei ban buh noh ïa ka ‘Dialysis Centre’ ha katei ka thaiñ namar ka jingkynrei kiba pang khyllai hapoh ka West Khasi Hills District kaba long palat hajar ngut ki briew.
“Ki paradoh-parasnam jong ngi ki hap wan shaduh Shillong ban wan leh ‘Dialysis’ haduh 5 ne 6 sien shibnai kaba ka jingjngai na Riangdo bad na Rambrai ka long kumba 150 kilomitar eiei kaba la pynlutksan haduh katta katta,” la ong u Bah Lumlang.Ha kajuh ka por, u la ong ba ka seng ka dawa ba ka Sorkar ka dei ban ai jingpynshai halor ka jingmih ki khubor ba la rah noh ïa ki tiar na ka Maternity and Child Hospital (MCH) na Nongstoiñ sha Mawkyrwat. Kumta ka dawa ba dei ban plie ïa ka MCH hapoh Nongstoiñ ba kan ai ka jingshakri kaba dei hok ïa ki longkmie bad ïa ki khynnah jong ka thaiñ.
“Ngi la wan ruh hangne ym tang na ka bynta kata hynrei ïa kane ka MCH ha Nongstoiñ kaba lah dep pyntrei naduh 2018 hynrei haduh mynta ym shym la lah ban plie noh ïa ka. Na ka liang ka Dr. Ampareen ka la ong ba la rah ïa ki tiar namar bym don nongtrei. Kumta la rah shuwa sha Mawkyrwat ban pyndonkam ïa kitei ki tiar,” la ong u Bah Lumlang.
Shuh shuh na ka liang ka seng ka la ong ba haba phai sha ka Civil Hospital, Nongstoiñ wat la ka dei ka distrik kaba la 46 snem hynrei ki jingdonkam hapoh katei ka jaka sumar ka dang duna bha la ka long ha ka liang doktor kiba la pyntbit, ki nos, ki nongtrei, ka jingbym don ka Intensive Care Unit (ICU) bad kiwei-kiwei ki jingdonkam.
Shuh shuh ka seng ka la dawa ba ka tnad ka dei ban buh ïa ki nos kiba pura bad 2 ngut ki doktor ha man ka Primary Health Centre (PHC). Ka seng ka dawa ruh ba ka tnad ka dei ban kyntiew noh ïa ki 3 tylli ki jaka ai jingsumar na ka PHC sha ka CHC kiba kynthup ïa ka Rambrai, ka Maweit bad ka Nonglang bad ïa ki 3 tylli ki Sub-Centre ban kyntiew sha ki PHC kiba kynthup ïa ka Malangkona, Kyrshai, Umdang, Seinduli bad ka Umyiap.
Na ka liang ka Myntri ka la ong ba kan sa leit ban jngoh hi dalade sha katei ka thaiñ ha ka 26 tarik u mynta u bnai ban peit bad ïakren ïa ki jingduna baroh kiba ka seng ka la dawa.
