Shillong, Jylliew 20:
U Chief Executive Member barim ka KHADC, Bah Titosstarwell Chyne uba dang shah pynkhyllem ka shuki ha ka 19 tarik Jylliew, 2023 mar shu ïa sdang ka dorbar mang tyngka, u la kyntu ïa u Bah Pynïaid Syiem hadien ba u la shah jied kum u CEM bathymmai mynta ka sngi ba um dei ban shaniah than ha ki paralok MDC kiba ïatreilang namar haduh mynta ka raibi ban shet kylla kam pat kut.
U Bah Titosstarwell u la ong hapoh ka KHADC um don u CEM u ban ïalam haduh ban da kut ka san snem, hynrei u kyntu ïa u Bah Pynïaid ba u dei ban long uba husiar bad peitngor bha ïalade namar kane ka raibi ban shet kylla kam pat kut.
U la ong ba wat la u shong ha ka liang pyrshah, hynrei un ïatreilang bad un long u nongaibuit aibor ban pynbha ïa ka council.
Ha kajuh ka por u la ai khublei ïa u Bah Pynïaid hadien ba u la shah jied thymmai kum u CEM khlem da don kino kino kiba ïakhun pyrshah ba un ïoh ïa ka met kaba shait ba khlaiñ.
Shuh shuh u Bah Titosstarwell u la pynpaw ka jinglyngngoh namar mar shu rung hapoh ka ïingdorbar u la ïohi ba u Bah Pynïaid u phong da kaba ïong katba ma u pat u phong da kaba lieh, hynrei kyrmen ba kane ka dei tang ka jingsngewtynnad.
U Bah Titosstarwell haduh kane ka sngi ba shimti u Bah Pynïaid kum u CEM um shym la lah ban ngeit ba un shah pynkhyllem ïa ka shuki CEM namar u da sngewlyngngoh ba kumno kita ki MDC kim pynpaw haba kim mon shuh ïa u namar dang ha ka taïew ba dang shu dep ki dang shu wan lang na Delhi.
