Jowai, Jylliew:
Ka shlem treikam u Superintendent of Police ka West Jaiñtia Hills District ka la bteng ïa ka jingpynsngewthuh paidbah ban ïakhun pyrshah ïa u drok bad ka jingkhaïi be-aiñ ïa u.
Ïa kane ka jingpynsngewthuh paidbah la pynlong ha Khimusniang ha ka jingïalam u ophisar ba khmih ïa ka thanad Jowai u Bah S Manar ha ka jingdonlang u General Secretary ka Dorbar Shnong Khimusniang u Bah W Bamon, u Traffic in-charge Jowai u Bah D Lamare bad kiwei kiwei.
U Bah S Manar u la ong, ka jingthmu ka long ban pynsngewthuh ïa ki paidbah nongshong shnong ba kim dei ban ailad ba u drok un kharoi ne un jyllei, hynrei ki dei ban ïeng tylli ban pyrshah ïa ka jingpyndonkam ne jingkhaïi ïa u drok.
U Bah H Syngkon uba dei u dkhot ka MCSWA u la kren halor ka jingshem jong u bad kumno u lait na ka jingkyrni na u drok.
U la batai shai ïa ka jingktah jong u drok uba dei u kynja dawai ba pynbuaid uba lam ïa u briew sha ka jingkyrni bad pynlong ruh ïa u briew ba un leh ki kam pyrshah aiñ bad bun ruh kiwei ki jingktah lada pyndonkam ïa u drok.
U la ong u drok u ktah ïa ka koit ka khiah ha ka met bad ha ka jingmut jingpyrkhat, u ktah ïa ka imlang sahlang, ka ïing ka sem bad ka shnong baroh kawei.
