Shillong, Jylliew 20:
U Chief Executive Member (CEM) bathymmai ka KHADC, u Bah Pynïaid Sing Syiem u la buh katto katne ki mat kiba ka Executive Committee kaba thymmai kan shimkhia kynthup ïa ka jingpynkylla ïa ka Khyrnit Bahynriew (Sixth Schedule amendment), ka jingleit peit ïa ki jaka khappud ha thaiñ Block-II bad kiwei ki jaka, bad yn buddien lang ban ïoh jingithuh noh ka ktien Khasi nalor ka jingpynurlong ïa ka Clan Administration Bill kaba dang sahteng ban ïoh jingmynjur na u Lat.
Haba kren sha ki lad pathai khubor hadien ba u la shimti kum u CEM, u Bah Pynïaid u la ong ka EC kaba thymmai ka don ka jingkitkhlieh bad kan trei na ka bynta ka Council bad ban rah ïa ka kyrteng jong ka.
Haba buh ïa ki mat kiba kham hakhmat kiba ka EC kam shim, u Bah Pynïaid u la ong ba ka mat kaba ïadei bad ka jingpynkylla ïa ka Sixth Schedule ka dei kaba la sahteng bad donkam ban mynjur da ka Ïingdorbar Parliament jong ka ri.
U la ong ba ka EC kan buddien ïa kane la ka dei lyngba ka Sorkar Jylla bad ruh bad ka tnat Korbar Ri (MHA) nalor ka jingbuddien ruh ïa ka mat ban ïoh jingithuh noh ïa ka ktien Khasi ha ka Khyrnit Baphra ka Riti Synshar.
Nalor kane, u la ong ruh ba ka EC kan shimkhia na ka bynta ki jingeh ki paidbah ha thaiñ khappud la ka dei ha thaiñ Block-II bad kiwei kiwei ki jaka. Ka EC kum ka kynhun kan sa leit ruh sha ki jaka khappud khamtam namarba kan don sa ka wat ba-ar jong ka jingpynbeit pud bad ka Assam.
U Bah Pynïaid u la ïathuh ba u la ïoh ruh ban ïakren lyngba ka phone bad u CEM ka Karbi Anglong Autonomous Council (KAAC) ha kaba u la banjur ban don ka jingïatreilang bad jingsngewthuh jingmut bad ym dei ban mih jingeh ïa ki paidbah kiba shong kiba sah ha khappud bad ka Karbi Anglong.
Haba kren shaphang kiba bun ki aiñ-rew (bill) kiba sahteng kiba la dep mynjur da ka KHADC naduh ki snem kiba mynshwa, u Bah Pynïaid u la ong ki don bun ki Bill kiba sahteng hynrei ka Sorkar Jylla ruh lyngba ka tnat District Council Affairs ka la thaw ïa ka Expert Committee ban khmih bniah ïa ki Bill khamtam ban pyntikna ban nym don jingeh lada phah ia ki Bill sha u Lat ban ai jingmynjur. Haba ïadei bad ka Clan Bill kaba la sahteng khlem pat ïoh ïa ka jingmynjur jong u Lat ka jylla, u Bah Pynïaid u la ong ba ka Clan Bill ka dei kawei kaba hakhmat eh ba ka EC kan buddien. Kane ka aiñ ka dei kaba la maitphang naduh ka por u CEM barim uba la khlad noh, u Bah HS Shylla.
U la ong ba ka Clan Bill ka kren shaphang ka jingtehsong bad ithuh noh da ka Council ïa ki jait kur bad na ka liang ka Executive Committee, kan sa leit ïakynduh ïa u Myntri ba peit ïa ka tnat DCA ban kyntu ïa ka Sorkar Jylla ban pynkloi noh ban phah sha u Lat ban ïoh ïa ka jingmynjur jong u. Nalor kata, u la ong ba ka EC kan trei da ka jingkitkhlieh na ka bynta ka bha ka miat jong ka jaitbynriew bad lyngba ki kam kiba bha kan long ka burom bad rah ïa ka kyrteng jong ka Council.
Namar kata, u la ong da ka jingïatreilang ha ryngkat ka jingshaniah, yn sa lah ban weng ïa ki jingeh kiba ka Council ka ïakynduh.
