Shillong, Jylliew 20:
U Bah Gabriel Wahlang uba dei u MLA/MDC ka Congress na Nongstoiñ Constituency u la ong ba ka jingai jingkyrshan jong ka Congress ïa ka National People’s Party (NPP) ka long tang ha Khasi Hills Autonomous District Council (KHADC) bad da lei lei ruh yn nym kyrshan pat ïa ka Sorkar MDA-II kaba ïalam da ka NPP ha ka jylla.
Haba kren sha ki lad pathai khubor ha ka sngi Ba-ar, u Bah Gabriel u la ong, ba ka Congress ka kyrshan ïa ka NPP tang ha District Council na ka bynta ka bha ka miat ha kaba ïadei bad ka kolshor.
Shuh shuh une u MLA/MDC ka Congress u la ong, “Ka District Council ka ïapher bak-ly-bak na ka sorkar jylla. Ha ka District Council ngi peit ïa ka bynta jong ka kolshor ki paidbah. Kumta kam don satia kano kano ka lad ba ngin leit ai jingkyrshan ïa ka sorkar MDA.”
Haba kylli la u Myntri Rangbah ka jylla u Conrad K Sangma uba dei ruh u President ka NPP, ki la pan ïa kano kano ka jingkyrshan na ka Congress, u Bah Gabriel u la ong ba u Myntri Rangbah um shim la ai ktien eiei ha kaba ïadei bad ka jingpan jingkyrshan na ka Congress.
Une u MLA/MDC ka Congress u la pyntip ba ka seng kan sa shong ïa ka jingïalang ha ka sngi Balang bad kumta un nym pat lah ban ong eiei namar um pat tip halor kaei ka bynta ba kin ïakren, namar la shu pyntip beit ba kan don ka jingïalang.
