Shillong Jylliew 20:
U Symbud Myntri Rangbah, Bah Prestone Tynsong uba peit ïa ka tnat District Council Affairs, u la ong ba ki Autonomous District Council (ADC) kim dei katkum seng saiñ pyrthei, ha kaba mano-mano ki lah ban leit sha kano-kano ka kynhun.
U Bah Prestone u la ong ïa kane haba kylli halor ka jingkylla ka saiñ hima ha KHADC ha kaba ki MDC ka NPP ki la ïatreilang noh bad ka Congress ban thaw ïa ka Executive Committee, katba ka UDP ka la shah weng noh sharud. U la ong ba ka Ïingdorbar Thawaiñ ka Jylla bad ka Ïingdorbar District Council ki ïapher hapdeng jong ki.
U Bah Prestone u la ong kum u Myntri ba peit ïa ka tnat District Council Affairs, u peit lang ïa baroh ki Autonomous District Council ha ka Jylla. Kumta u la ong ba ka shong beit ha ki MDC kumno ki treikam bad ki thaw kynhun badno ha District Council.
