Shillong, Jylliew:
Namar ka jingbun palat ki nongri masi, kynthup ïa kiba ri masi khem dud, kiba la mad jingeh na ka daw ka jingpang jong ki, ka UDP Mawlai Circle ha ka sngi Nyngkong ka la kyntu ïa u Myntri ba khmih ïa ka tnat Animal Husbandry & Veterinary jong ka sorkar Meghalaya ban ai jingïarap ïa kine ki nongri masi kiba don hapoh ka jylla.
Haba kren sha u nongthoh khubor, u Bah Process T Sawkmie, u nongïalam ka UDP Mawlai Circle u la ai khublei ïa ka sorkar lyngba ka tnat Animal Husbandry and Veterinary ba ki la dep ai injek ïa kumba 20,000 ki masi, hynrei ki dang bun kiba sah, kiba lah ban poi da ki lak kiba donkam ïa ka jingïada bad u la pynpaw ba bun ki nongri masi ki la mad jingeh bha bad ki donkam ïa ka jingïarap jong ki.
“Ka sorkar lyngba ka tnat ba khmih ïa ki jingri jingdup ka dei ban thaw lad thaw lynti ban ai jingïarap ïa kiba la shah ktah,” la ong u Bah Process.U la ong, “Nga kyntu ïa ki nongri masi baroh kiba don ha ka jylla ba kin pyntip sha la ki district veterinary, khnang ba ka sorkar kan ïoh lum jingkheiñ ban ai jingïarap ïa ki.”
Nalor kane, u la pynpaw ruh ba u la ïoh jingtip ba wat kiba ri masi khem dud ki mad jingeh bha, ka dud kim lah shuh ban shalan, hynrei ki hap ban pynbiang bam pat ïa ki man la ka sngi bad kumta ma ki ruh ki donkam ïa ka jingïarap na ka sorkar.
