Mynjur ka JHADC ïa ka Village and Town Development Council Bill

Jowai, Jylliew 20:

Ka Jaiñtia Hills Autonomous District Council (JHADC) ka la mynjur ïa ka Jaiñtia Hills Autonomous District Council (Village and Town Development Council) Bill 2023 ha ka dorbar kyrpang kaba shisngi kaba la long ha ka sngi Ba ar.

            Kane ka aiñ rew (bill) ka dei na ka bynta ban wanrah ïa ki kam pynroi ha ki shnong ki thaw ha ki jaka sor bad nyngkyndong lyngba ka sorkar pdeng.

            U Chief Executive Member JHADC u Thombor Shiwat u la ong, ka daw ba la wanrah ïa kane ka aiñ ka dei hadien ba la bthah da ka sorkar jylla ba ki district konsil ki dei ban pynkhreh ïa ka aiñ village council, namar ba ym shym la pynkup bor ïa ki. Kumta ban pyntreikam ïa ka village council baroh ki district council ki dei ban thaw ïa ki aiñ ba kin don ka bor kaba kyrpang ha ki village council.

            U la ong ruh ba imat ka sorkar pdeng ha kane ka dorbar lyuir ha Parliament kan ai noh ïa ka jingmynjur ban pynkylla thymmai ïa ka Sixth Schedule ban pynkhlaiñ bor ïa ki konsil.

            “Kane ka bill ka dei kaba donkam ban tehsong ïa ki shnong ki thaw lyngba ka Village and Town Development Council ki ban trei katkum ka aiñ bad ki kyndon ban wanrah ïa ka roi ka par bad kino kino ki jingtrei ki dei ban ïaid lyngba ka konsil,” la ong u CEM u Thombor bad bynrap kane ka bill ka dei na ka bynta ka jingmyntoi ki shnong hapoh u pud u sam ka konsil bad kino kino ki jingai jingmut kin tynsad lang bad ngin shim ïa ki jingai jingmut jong baroh ki para dkhot khnang ba ngin ïoh phah noh mar mar sha ka sorkar ban ïoh ïaka jingmynur u Lat.

            Katkum ka Bill ki dkhot jong ka, kidei ki dkhot shnong ba pura, ki dei ruh ban long ki nongshong shong ba pura ka Jylla bad ki dei na ka jaidbynriew Pnar, Khasi, War, Bhoi, Biate bad Hmar (native of Khaddum nad Sialkan Village).

            Ki Village and Town Development Council ki dei kiba ithuh da ka konsil kaba la thaw da ka dorbar shnong. Ki dkhot jong ka, kim dei ban duna ïa ka 10 ngut kynthup lai ngut ki kynthei.

            Kan don ïa u Chairman, Vice Chairman, Secretary, Assistant Secretary bad Treasurer. U Waheh Shong u dei u Chairman jong kano kano ka Village and Town Development Council.

            Ki dkhot kin dei kiba la kynjoh ïa ka rta kaba 25 snem shaneng uba dei u trai shnong ba pura bad u dei ban long u trai ri bad u/ka ym dei ban long kiba la shah rai pynrem palat ïaka 6 bnai.

            Ka por treikam kane ka council ka long kam dei ban duna ïaka 1 snem lane 3 snem. Ki dkhot kim dei ban long kiba trei hapoh District Council, MLA, MP, MDC lane ki nongtrei hapoh ki tnad sorkar.

            Ka jingtreikam kane ka council kan long beit thik ïa ki kam pynroi shnong, kata ban shna ïa ki surok bad ban maramot, ki jaka pynlang um, nala, ban pynpoi um sha ki jaka rep bad kiwei kiwei ki kam pynroi.

            Kane ka aiñ ka pynkupbor ïa ki bor shnong ban don ïaka Local Area Development Planning Council bad hapoh kane yn kynthup ïa ki MDC ban long ki dkhot bad u officer ka konsil un long kum u/ka secretary.

            Katba ha ka District Development Planning Council, ka Executive Committee jong ka konsil ka don ka bynta kaba khraw ha ka ban ïatai bad wanrah ïa ki kam pynroi bad u Secretary District Development Planning Council u/ka secretary JHADC.

            Shuh shuh ki Village and Town Development Council kin hap ban buh ryntih ïa ka jingkheiñ jingdiah, ka don ruh ka social audit bad lah ruh ban pan RTI nalor kiwei kiwei ki lad jingujor lada phiel ka jingtreikam ki village and town development council.

            Ha kane ka aiñ ki dolloi/sirdar kim don kano kano ka bynta eiei bad la pynkup bor pura ïa ki bor shnong.