Nongpoh, Jylliew 20:
Ha kawei ka jingjia kaba la jia ha ka step Sngi Ba-ar, uwei u heprit uba dang 9 snem ka rta u la duh noh ïa la ka jingim hadien ba u la ngam jyllop ha ka shiliang jong ka Wah Umtrew ha ka shnong Amtola jong ka thaiñ Byrnihat kaba dang dei ha ki bynta jong ka jylla Assam.
Kumba la ïoh lum jingtip, la ïathuh ba kane ka la jia ha ka por kumba 10 baje mynstep katba utei u heprit uba la tip kyrteng kum u Asabul Ali lem bad ki hynmen kynthei bad paralok ki dang ïalehkai harud katei ka wah ban lait na ka jingshit kyrang jong ka sngi. Hynrei, kyndit kynsan utei u heprit u la kum syntuid bad hap shapoh wah kat haduh ba un duh syndon ïa la ka jingim.
Na ka liang ki hynmen kynthei lem bad ki paralok utei u heprit mar-mar ki la leit mareh ban ïathuh ïa ki bahaïing halor katei ka jingjia, kiba la pyntip pat sha ki pulit ka Byrnihat kiba la leit mareh bran-bran sha katei ka jaka bad pyntip ruh sha ki pulit ka jylla Assam na ka bynta ban phah ïa ki Emergency and Rescue Team (ERT).
Ïa ka met jong utei u heprit la ïoh ban sei noh na katei ka wah ha ka por 1 baje eiei da ki briew jong ka ERT na ka jylla Assam ha ka jingïadon ryngkat ki pulit na ka thanat Byrnihat.
