Shillong, Jylliew 20:
Haduh hynriew ngut ki briew ki la shah kem noh ha ki pulit ka Anti Narcotics Task Force (ANTF) ka East Jaiñtia Hills ha ka Sngi Ba-ar bad na kine la ïoh ruh ban kurup ïa u ‘ganja’.
U Superintendent of Police ka East Jaiñtia Hills, u Jagpal Singh Dhanoa, u la pyntip ba kine baroh ki dei na South Tripura. Kine kiba shah kem ki dei kiba la tip kyrteng kum u Joyel Das, Pronoy Mazozumdar, Gaurav Gupta, Karnajit Sarkar, Sujit Sarkar, Tutal Sarkar bad Sanjit Sarkar.
La ong ba ha ka por ba ki pulit ki la pynlong ka jingtalasi kali, kawei ka kali Tata Tigor kaba don ïa u number TR01-BT-0265, ka la phet na ka jaka talasi kali ha Nongsning bad pynher sted bha. Hynrei la ïoh ban bat noh ïa kane ka kali najan ka thanat ha Khliehriat lem bad 3 ngut ki briew kiba don ha katei kali.
Hadien katei la pynlong ka jingtalasi ïa ka kali bad ïoh kurup haduh 57 song u ganja ba khia haduh 251.30 kilo. Ïa kane la pynthikna ruh da kaba leh ïa ka test.
Kumta haba la pynlong ka jingtohkit kaba bniah, kine kiba la shah kem ki la phla ba u trai ka kali bad u ganja ha ryngkat bad lai ngut ki paralok ki la wan da kawei pat ka kali ba don u number TR01-BW-0231 kaba lam sha ka jingïoh kem sa ïa ki lai ngut kiwei ha Kongong, EJH bad la wanrah ïa ki sha thanat Khliehriat.
Ha kaba ïadei bad kane, ki pulit ki la pynrung case pyrshah ïa kine ki briew ha thanat Khliehriat bad ka jingtohkit mynta ka la ïaid shakhmat.
