Shillong, Jylliew 20:
Ka kynhun ki nongdie bad nongkhaïi dohkha hapoh Ïewduh kiba don hapoh ka shatri jong ka Khasi Jaiñtia Fish Wholesellers and Retailers Association (KJFWRA) ha ka sngi ba ar ki la leit ban ïakynduh ïa u Myntri ka tnad ri dohkha ka jylla, u Bah AL Hek ban pynsngew halor ka jingdawa ba ki nongdie bad ki nongkhaïi dohkha ki kwah kata ban buh ïa ka jaka leh test ïa ki dohkha kiba wanrah nabar jylla ha khlieh Ïewduh.
Haba kren sha ki lad pathai khubor, u Bah Mitchell Wankhar uba dei u President jong katei ka kynhun, u la ong ba u Myntri u la ong ba ka tnad kan sa buh ïa ka jaka test ïa ki dohkha hapoh Saiden, Ri Bhoi District. Hynrei u Bah Mitchell u la ong ba ka jingkwah jong ka kynhun ka long ban wanrah ïa ka jaka test ha Khlieh Ïew namar katei ka dei ka jaka kaba la wanrah ïa ki dohkha bad baroh ki mar kiba poi na kylleng kylleng ki jaka ka wan poi ha Khlieh Ïewduh.
U la ong ba ka kynhun kam don kaei kaei pyrshah ïa ka Myntri ka tnad ka koit ka khiah, ka Dr. Mazel Ampareen Lyngdoh namar kam dei tang kane ka Myntri kaba don jingpyrkhat na ka bynta ka koit ka khiah jong ki paidbah hynrei ka jingpyrkhat ka dei ruh ïa ki nongdie bad ki nongthied namar lada ïoh bad wanrah ïa ka mar kaba ym lah ban bam, wat ki nongdie ruh kim long ban bam. U Bah Mitchell u la ong ba ka dor jong ka dohkha ka dei ka dor kaba tad tam na ki mar bam baroh. Hynrei lada khleh injek sa ka dawai ‘Formalin’ ha ryngkat ka jingbuh ïa u nongai injek, ka mut ka dor jong ka dohkha ka la rem. “Kata ka dei kaba ngi hap ban pyrkhat, phin ym lah ban pyndonkam da ki dawai kiba rem bad ban die pat ha ka dor kaba tad”, la ong u Bah Mitchell. U la ong ruh ba ka kynhun kan sa leit ban ïakynduh ïa ka Myntri ka tnad ka koit ka khiah jong ka jylla bad ïa ka Commissioner jong ka Food Safety, ka Kong RM Kurbah ban ïakren namar haduh mynta ki nongdie bad ki nongkhaïi dohkha ki sah ha ka umdum namar kim tip naei la shim ïa ka jingleh test ïa ki dohkha kiba la kynnoh ba la lap ba ka don ka jingkhleh dawai ‘Formalin’.
