Shillong, Jylliew 20:
Ka Khasi Students’ Union (KSU) bad ka Ri-Bhoi Youth Organisation (RBYO), Umling Unit ki la ïoh bat ïa kawei ka trok (ML-10-B-7798) kaba kit ïa 25 ngut ki bar jylla kiba thmu ban rung tuh sha ka Jylla.
Katei ka la jia ha ka por kumba 11 baje eiei jong ka 18 tarik mynta u bnai.
Hadien ba ki dkhot jong ki 2 seng ki la peit ïa ki kot ki sla jong kitei ki briew, la shem ba kim don satia ïa ki kot ki sla kiba biang bad kitei ki briew ki la pynkheiñ ruh ïa ka Inter-state Migrants Workmen (Regulations of Employment & Conditions of Service) Act, 2011.
Haba kylli ïa kitei ki bar jylla shaei ki thmu ban leit, ki khlem ai ka jubab kaba shai bad don napdeng jong ki kiba jubab Shillong bad don pat kiba jubab ha Umsning.
Kitei ki bar jylla kim don ka jubab kaba shai ne ki kot ki sla kiba biang, ong ki dkhot ki 2 seng.
Kumta na ka liang ki 2 seng, ki la pynphai noh mardor ïa kitei ki bar jylla da katei kajuh ka trok bad mana ba kim dei ban wan sha ka Jylla khlem ki kot ki sla kiba biang.
