Nongstoiñ, Jylliew 20:
Ka Khasi Students’ Union (KSU) West Khasi Hills District Unit ha ka jinghiar ban leit jurip kyndit ïa ka jaka sah jong ki nongtrei bar jylla ka kompeni shna ïa ka surok Nongstoiñ – Rambrai – Kyrshai ha West Khasi Hills ban peit bniah ïa ki kot ki sla, ka la lap pynban ba ar ngut ki nongtrei ki la leh kynshleiñ ïa ki khynnah kynthei.
U samla Wanbhakupar Lyngdoh Nonglait, Organisation Secretary ka KSU West Khasi Hills, u la ïathuh ba ka jingleit ban jurip ïa ka jaka sah ki nongtrei ka kompeni ka long ban peit ïa ki kot ki sla. Pynban kaba lyngngoh ka long ba don ar ngut ki briew na katei ka kompeni kiba la leh kynshleiñ ïa ki kynthei khynnah bad ka KSU kaba la ju maham ba lada ki wan trei ki dei ban trei beit ïa kata ka kam kaba la bynshet ha ki ym ban mushlia ne leh kynshleiñ ïa ki kynthei khynnah da kaba thmu ban shim kabu ïa kaba ym lah ban pdiang satia kum ka thaiñ.
Kumta ka seng haba ka lap ïa katei ka la sneng ha ryngkat ka jingdonlang ki briew jong ka shnong bad na ka liang ka kompeni ka la beh kam noh ïa ki.
Haba ïadei bad kane ka bynta ka KSU ka maham ba lada nangne shakhmat kan lap ïa kum kine ki jingjia kan leh da kaba tyngeh.
Ha kawei pat ka liang, ka KSU ha kane ka jinghiar jurip ka la lap ruh ba haduh 20 ngut na ki 100 tam ki nongtrei kiba trei bad kane ka kompeni kim biang satia ïa ki kot ki sla.
Na ka liang u samla Wanbhakupar u la ong ba ka jingleit ban jurip jong ka KSU ïa katei ka jaka sah jong ki nongtrei bar jylla ka kompeni shna surok kaba don ha kawei na ki jaka ha ka shnong Mawthung Marwei ka dei hadien ba ka la ïoh jingtip ba ki don ki nongtrei bar jylla kiba dang wan thymmai. Namar kata, ka KSU mar-mar ka la phah leit phai noh ïa ki sha ka jaka kaba ki wan.
