Shillong, Jylliew 20:
U MDC ka Sohryngkham, u Bah Pynïaid Sing Syiem u la shah jied kum u Chief Executive Member (CEM) uba thymmai ka Khasi Hills Autonomous District Council (KHADC). Ïa katei la pynbna da u Chairman ka KHADC u Bah Lamphrang Blah khlem da don kano-kano ka jingïakhun.
U Bah Pynïaid u dei u MDC uba la shah jied la arsien kynthih ha kaba u la jop ha ki ar tylli ki ilekshon MDC ha u snem 2014 bad 2019. U Bah Pynïaid ha ki snem ba la leit, u la long teng u Chairman ka KHADC, bad ruh kum u Dy CEM nalor kiwei kiwei ki kyrdan ha KHADC.
U Bah Pynïaid mynta un ïalam ïa ka Executive Committee kaba thymmai ka ban lamkhmat da ka National People’s Party (NPP) ha ryngkat ka jingïatreilang bad ka Congress.
Ka jingjied ïa u CEM bathymmai ka dei hadien ba ka Executive Committee kaba ïalam da ka United Democratic Party (UDP) hapoh ka jingïalam u Bah Titosstarwell Chyne kum u CEM ka la khyllem noh ha ka Lah Sngi U Blei (19 tarik Jylliew).
Da ka jingïatreilang hapdeng ka NPP bad ka Congress ha KHADC hapoh kawei kynhun synrop ba la tip kum ka Khasi Hills Democratic Front (KHDF) bad ki MDC kiba donlang ha kane ka kynhun ki long 18 ngut kynthup ïa u Chairman.
Hynrei ka UDP mynta ka don sha ka Liang Pyrshah ha KHADC, wat lada ka ïatreilang bad ka NPP ha ka Sorkar MDA-II ha Jylla kaba ïalam da ka NPP.
Ka HSPDP ruh kumjuh kam donlang shuh ha ka EC ha KHADC wat lada ka ïatreilang ha ka Sorkar MDA-II.
Ka EC ha KHADC ka dei ban don 11 ngut ki dkhot kynthup ïa u CEM.
Ka NPP bad ka Congress mynta ki la ïabhah kam hapdeng ki MDC, ha kaba ka NPP kaba ïoh ïa ka kyrdan CEM bad Chairman, ka ïoh ruh ban pynrung 8 ngut ki Executive Member (EM).
Ka Congress ka ïoh 2 ngut ki EM lem bad ka kyrdan Dy CEM nalor ka shuki Deputy Chairman ka KHADC.
U MDC ka Mawkhar-Pynthorumkhrah konstitwensi, u Bah Pynshngaiñlang N Syiem uba la long teng u CEM ka KHADC, bad u MDC ka Mawkyrwat, u Bah Carness Sohshang kin rung kum ki EM na ka liang ka Congress, katba u MDC ka Mawhati u Bah Charles Marngar u shimti kum u Symbud Lamphang (Dy Chairman) ka KHADC.
Ïa ka thup kyrteng jong baroh 10 ngut ki MDC kiba dei ban long ki EM, la phah da u CEM sha u Lat ba un ai ka jingmynjur.
