U kurim ka longkmie armet ba suba shah pynïap u don ha along

Shillong, Jylliew 20:

U kurim jong ka longkmie armet kaba la suba shah pynïap ha ka 14 tarik mynta u bnai ïa uba la tip kyrteng kum u Trophius Nongbri u la don ha along.

“Ïa kane ka jingujor la pynngat ha ka kyndon 302 jong ka IPC. U kurim u la shah kem bad mynta u don ha along (Judicial Custody),” la ong u S.P. City, Bah Vivek Syiem.

Ka kyndon 302 ka ïadei bad ka jingpynshitom na bynta ka jingpynïap briew. Kino-kino kiba donkti ha kane ka kam kin shah pynshitom da ka jingïap ne shah set along shirta jingim bad kin shah daiñ kuna ruh kumjuh.

Kum ban shu kdew hangne, ïa katei ka longkmie ba la suba shah pynïap la tip kyrteng kum ka Kong Steffanie Lyngdoh Nonglait. La lap ba ka la khlad ha ïingsah lajong ha kaba u kurim jong ka, u Bah Trophius Nongbri u la kam ba ka la shim noh ïa la ka jingim da kaba shu phasi.

Katei ka la jia ha ka miet 14 tarik Jylliew ha Mawlai Mawdatbaki Mali-I.

Na ka liang ki bahaïing hasem jong ka Kong Steffanie ki la suba jur ba ka la shah pynïap ha la u jong u kurim bad ïa ka ejahar la ujor da ka Kong Amanda L. Nonglait kaba dei ka para jong katei ka longkmie (kaba khlad) ha Thanat Mawlai.

Ka Kong Amanda ka la ïathuh ba ha por 9 duna ne 9 baje mynmiet jong ka 14 tarik, la ïoh ïa ka khubor ba ka hynmen jong ka, ka la khlad ha kaba u kurim jong ka, u Bah Trophius Nongbri, u la wan ïathuh hi dalade sha Mawlai Nongpdeng ba ka kurim jong u ka la leh klumar bad ka la phasi ïalade.

Ka Kong Amanda ka la ong ba ynda la leit sha ïing sah jong ki ha Mawdatbaki Mali-I, la lap pynban ba ka rukom ïap jong ka hynmen jong ka, ka long kaba pynsuba sniew namarba ki don ki dak ki shin ha ryndang bad ïa ka met ïap la tap da ka nep ha jingthiah.

Kane ka la pynartatien ïa ki bahaïing namar kam ïahap bad kaba ïathuh u kurim jong ka uba la kam ba ka kurim jong u ka la shim hi ïa la ka jong ka jingim da kaba shu phasi.

La ong ruh ba katei ka longkmie ka la armet bad i khyllung ha kpoh i dang don 2 ne 3 bnai.

Shuh shuh ka la ong ba kum ka ïing, ym lah satia ban pdiang ba ka hymmen kan shu ïap hi, khamtam namarba kam don kano-kano ka jingshitom.