Shillong, 20 Jylliew:
U MLA barim ka Mawsynram konstitwensi uba dei ruh u nongaibuit ka tnat ka koit ka khiah jong ka sorkar jylla, Bah HM Shangpliang u la pynpaw ïa ka jingsngewsih kaba khraw haba u lyoh uba dum u la wan kah ïa ka ïing ka sem jong ki hynriew ngut ki mynsiem briew kiba la khlad ha riat Thiedding katba ki dang wanphai na Mawsynram.
Ha kajuh ka por u la kyntu ïa ki bor sorkar khamtam eh ïa ka tnad PWD ba kin kham pynkloi noh ban pyndep ïa ka surok sha Thieddieng kaba la dep mang pisa na ka skhim PMGSY.
Haduh mynta ïa ka met jong kawei ka longkmie ym pat lah ban lap wat lada ka jinghap kane ka kali sha riat ka la ïaid shi taïew kynthih kaba la jia ha ka 13 tarik jong mynta u bnai, hadien san ngut kynthup ïa iwei i khyllung la dep lap mynshem taïew.
Kumta ha ka 20 tarik mynta u bnai ha ka por 1 baje shiteng sngi ki nongshong shnong jong ka Thieddieng ki la lap ïa ka met jong ka longkmie na kawei ka jaka kaba kham riat kaba don kham sharum.
Kum ban shu pynkynmaw, kane ka longkmie ka la wanphai lang bad la u lok haba ki leit shim dawai ïa i khun ba dang 2 snem iba shitom, hynrei u lyoh badum u la wan tap ïa kane ka longïing haba ka kali kaba shong ka la hap noh sha riat.
