Shillong, Jylliew 20:
U Bah Pynïaid Sing Syiem hadien ba u la shimti kum u Chief Executive Member (CEM) ka Khasi Hills Autonomous District Council (KHADC) ha ka sngi Ba-ar, u la buh lypa ka jingmaham pyrshah ïa ki nongkhaïi bar jylla, da kaba ong ba kim dei ban leh sngew shngaiñ ne khaïi kylluid mynsiem khlem da shim ïa ka ‘Trading Licence’ ne ka laisen ban khaïi hapoh u pud u sam jong ka Council.
“Ngin nym lah satia ban map ïa ki bar jylla ba kin pynïaid shakhmat ïa ka khaïi pateng ka jong ki, khlem da shim ïa ka laisen khaïi napoh ka council. Kumta nga kwah ban phah ïa ka jingmaham ba tyngeh sha ki bar jylla ba kim dei ban khmih lynti ba ki lah ban pynïaid ïa ki kam khaïi jong ki hapoh u pud u sam ka Council khlem ka Trading Licence. Ngin ïai bteng ban talasi pyrshah ïa ka jingkhaïi beaiñ kat kum ki kyndon jong ka Trading by Non-Tribal Regulation Act. Ngin khang khyrdep ïa ki dukan ba beaiñ,” la ong u Bah Pyniaid haba kren sha ki lad pathai khubor.
“Kawei ka khubor ba ngan ai sha ki bar jylla kiba khaïi hapoh u pud u sam jong ka council, wat mut ba phin ïoh lad ban khaïi laitluid hangne, wat nym sngew shngaiñ namar ïa ka kamram ba la aibor ha ngi, ngin leit ban talasi bad khynra beit, bad ïa kito ki bym ithuh ïa ka district council, la ka dei ban hap khang ruh ngin khang beit. Kiba aplai da ka lynti kaba dei ruh kan shong pat ha ka Executive Committee ban ai ne yn nym ai,” la ong u Bah Pyniaid.
U la ong ruh ba ki nongthaw jong kane ka aiñ kila wanrah ïa ki kyndon kiba khlaiñ ban ïada ïa ka kamai ka kajih bad ka jakpoh jong ki trai paid riewlum ka Jylla.
Shuh shuh u CEM ba thymmai u la pyntip ba kane ka EC ba thymmai kan nym ai NOC satia na ka bynta ban shna lynti rel ha Ri-lum Khasi bad ong “Ka nongrim jong ngi kala shai bha halor kane ka kam”.
Lah ban kdew hangne ba ki kynhun seng bapher bapher kila pyrshah ïa ka jingwanrah lynti rel sha Jylla katba kam pat don ka aiñ ka ban teh pyrkhing ïa ka jingwan rung kyrthep ki bar jylla shapoh ka Jylla.
