Shillong, Jylliew 20:
Ka Executive Committee kaba thymmai ka KHADC, kan kham pynkhlaiñ noh ïa ka tnat Information Technology (IT) ha ka rukom treikam khamtam ban pynsted ruh ïa jingphah ïa ki syrnot haba pyntreikam ïa ki projek lane ‘Utilisation Certificate’ bad kiwei kiwei ki jingdonkam kiba ïadei bad ka jingpyntrei ïa ki projek kiba wan na ka Sorkar Pdeng kum ka ‘Tied bad Untied Grant.’
Haba kylli halor ka jingslem ka KHADC ban pynbiang ïa ki syrnot ba dep pyntrei ïa ki projek, u Bah Pynïaid kum u CEM u la ong ba ka jingpynslem ka Sorkar Pdeng ban pyllait ïa ka pisa kaba dei ban wan sha ka Council kum ka ‘Untied Grant’ lehse ka lah ban dei na ka jingbym lah pynbiang ïa ki syrnot ïa ki projek lane ‘Utilisation Certificate’. U la ïathuh ruh na ka liang ka Sorkar Pdeng ruh ka la pyntreikam ïa kawei ka ‘portal’ kaba tip kum ka ‘eGramSwaraj’ ka ban kham pynsuk bad kham pynsted haba pynbiang bad ïa ki kot ki sla haba ïadei bad ki projek kiba la pyntrei lyngba ka Council.
Une u CEM bathymmai ka KHADC u la pynpaw ba kam long satia kaba suk ïa ka Council ban pyntrei ïa ki skhim namar ka leit sha ki shnong ki thaw bad ki projek kin shimpor beit haba pyntrei ïa ki.
Kumta u la ong ba ka Sorkar Pdeng lyngba ka Ministry of Panchayati Raj, ka la pynïaid ïa ka portal ‘eGramSwaraj’ haba ïadei bad ki Utilisation Certificate, bad kin sa don ki briew ki ban wan ai jinghikai ïa ka tnat IT jong ka KHADC khnang ba yn lah ban pyntreikam bad kan pynsuk ïa ki tnat treikam jong ka Council lyngba ka jingdon ki kor ki bor.
Ka KHADC ka ïoh ka ka pisa na ka Sorkar Pdeng lyngba ka 15th Finance Commission kumjuh ruh lyngba ka Article 275 ka Riti Synshar ka ri ban leh ïa ki kam pynroi bapher bapher ha ki shnong ki thaw lyngba ki MDC.
U Bah Pynïaid u pynpaw ka jingsngew skhem ba da ka jingstad ka juk mynta, yn sa lah ban pyndep kloi ban pynbiang ïa ki jingdonkam haba pyntreikam ïa ki projek.
Shuh shuh u la ïathuh ba u dang lum ïa ka kaiphod halor ka jingkheiñ jingdiah halor ka jingïoh pisa ka Council. U la ïathuh ba ki don ki skhim na ka Sorkar pdeng kiba ka council ka ïoh na ka bynta ki kam pynroi, bad ka don ruh ka bhah ba ki lah ban pyndonkam na ka bynta ka jingdonkam jong ka council.
U la ong ba ka Council ka don ruh ïa ka jingmih nalade lyngba ki khajna bapher bapher jong ka council bad ruh lyngba ki khajna kiba ka Sorkar ka bhah sha ka Council.
